Turkey-i tashiyim agi yimsüsütsü tashi agitsü meranger madak takok nguogo

Turkey linük indang yimsüsütsü tashi tashiyim agi agitsü meranger rong nung densemer Turkey mitkartemi Istanbul kübok Bosphorus Bridge nung peisasa sorkar nem bendanga agütsüba sülen Turkey Tir, Tayyip Erdogan pusemertem pelatepba noksa ka yangi angur. (Istanbul, July 16)

Ankara, July 16 (Agencies): Turkey mitkar telok kati Turkey linük indang yimsüsütsü tashi tashiyim agi yashi, Hokolbar nü agitsü merang saka Turkey sorkar pusemer mitkar aser nüburtemi aroki lungjemer sorkar anema nokdakertem madak takok anguba osang jangjaogo.
Tan tashiyim agi yimsüsütsü tashi agitsü meranger mitkartemi tongpang nung amshitsü tank aser helicopter tayimtsü amshia, Ankara yimtiba nung tentetba sorkar itangitsü tesepti o parliament ki na aser Istanbul nung tentetba tongti apu ka agia tongpang raraba osang angazükogo.
Sorkar pusemer aser yimsüsütsü tashi agitsü meranger mitkartem na tsüngda tongpang raradang nüburtem densema, nisung 250 shi asüba aser nisung 2,839 shi yiruba osang tang tashi nung jangjaogo.
“Tan yimsüsütsü tashi agitsü merangertemi kü taküma agitsü merang,” ta shia, sorkar anema nokdaker mitkar lenir aser züngsemtem ajunga pua parnok nem ozüngi melaba ama tapet temerenshi agütsütsü tetuyuba ka tan lendong atalokdang Turkey southwest tsütsü tzüyimkümlen anisüngzüka alisang, Turkey Tir, Tayyip Erdogan-i Atatuk Airport tonga tanep, Honibar anepdang aoba sülen metetdaktsü.
“Turkey indang yimsüsütsü tashi tashiyim agi agitsü merangba osang angazükba sülen ni Marmaris jila toktsü saka tan yimsüsütsü tashi tashiyim agi agitsü merangertemi ni Marmaris toktsüba osang melazüki ni anisüngzükdak bomb tsükdakja amakba kuli bushitetogo,” ta pai osang jangjashitsü.
Tan tashiyim agi yimsüsütsü tashi agitsü merangba sülen Turkey sorkari aibelenba mitkar lenir aser züngsemtem pua ayuba den külemi, o bendangertema nisung 2,745 tashi o bendangtsü menden nungi anentsüba osang angazükogo.