Turkey-i tepuokdak puoka ayur nisung 38,000 chioktsü renemshir

Ankara, August 17 (Agencies): Turkey sorkari par tepuokdak puoka ayur nisung 38,000 shi chioktsü renemshiba osang ka par Justice Minister, Bekir Bozdag-i tanü, Bodbar nü sangoktsüogo.
Tawa mitkar telok kati linük indang yimsüsütsü tashi tashiyim agi tamakok ngua agitsü merangba sülen iba ken o nung ajemdaker apurtem tepuokdak puoka ayutsü nükjidong nung temerenshi mapang küm 2 den tekübok anünga alir aibelenertem chioktsü asoshi sorkari tan sentong renemer lir.
“Tan tepuokdak puoka ayurtem chioktsü renemba ya parnok nem taidok agütsür masü saka parnok talenba nung tepuokdak nungi temai adokdaktsür lir. Parnok inyaksangi aser senzüsenpongbaren ajunga sorkari maneni tendangtsü,” ta Bozdag-i osang jangjashitsü.
“Tan tepuokdak puoka alirtem chiokba ajanga par kinünger, ozü nübur aser linük ajunga nem tajangzük tulu bener arutsütsü imlar,” ta pai ashi.
Ano, tepuokdak puoka alitsü mapang küm 2 den tekübok anünga alir chioktsü renemba den külemi, temerenshi mapang tesadang ki anünga alirtemia talenba nung chioktsü lenmang lapokja aliba olen ka pai metetdaktsü.
Ajisüaka, nisung tepsetba, kiralongraba, pei kibong züngsem dak teka sangshiba  aser tashiyim agi taküm raksatsüba ken o nung aija tepuokdak puoka alirtem nembo taochi mesayutsü renemba osang ka pai sangoktsü.
Mitkar teloki tashiyim agi linük indang yimsüsütsü tashi tashiyim agi agitsü merangdang tajemba agi nisung 270 shi tepseta taoba July ita 15 nü lendong ajuruba osang bushiteta lir.
Yamaji atalokba sülen obendanger, kaketshisatsü alir aser osangbener densema, sorkari tashiyim agi linük indang yimsüsütsü tashi agitsü merangba ken o nung ajemdaker nisung 35,000 shi pua merenshiba osang bushitetogo.