Turkey mitkartem Iraq nungi anitettsü atema NATO ajungshir: Abadi

Baghdad, December 09 (Agencies): Turkey-i tang Iraq anüdoklentip tsütsü yuja aliba mitkartem anitettsü ajungshitsü asoshi Iraq Ato Kilonser, Haider al-Abadi-i North Atlantic Treaty Organization (NATO) den ken o benokogo.

NATO nung Turkey anema ken o benokba jakdang Turkey-i par mitkartem Iraq nungi anitettsü takhangba olen ka Iraq sorkari metetdakja liasü.

Ajisüaka, Iraq mitkartem nem tongpang raratsü terenemshiba agütsüba mitkar takümtem kümzüka ayutsü nükjidong nung par mitkartem Iraq-i yokshi ta shia, Turkey-i par mitkartem Iraq nungi manitettsü lemtetba osang sangokja lir.

Turkey mitkartem Iraq anüdoklentip tsütsü Mosul yimti anasa yutsüba ajanga Islamic State (IS) kiralongrar telok tettsüti den tongpang rarabaren nung maneni tashishitsü ken o tan adokshir lir.

“NATO-i par züngsem, Turkey-i tekaraba mapang nung par mitkartem Iraq lushi nungi anitettsü ajungshitsü akhanger,” ta Abadi-i tanü metetaktsüogo.

Abadi-i NATO Secretary General, Jens Stoltenberg den tanü telephone ajanga jembidang iba takhangba olenji metetdaktsüba osang jangjaogo.

Ano külen, “Turkey-i par mitkartem Iraq-i yokbaji ozüng alema inyaker lir,” ta shia, Turkey’er mitkar tayimtsü anati par jet tayimtsü ka anüng tom nungi kazüka yokba sülen Turkey dang kanga jashia aliba linük, Russia-ia Turkey aitsüogo.