Turkey nung Army tanishir ka dena nisung 6,000 tema puogo

Ankara/Alexandroupoli, July 17 (Agencies) : Turkey nung Tir Recep Tayyip Erdogan’er sorkar atsüngdoktsüba merangba nung shilem agi ta aija ketdangsertemi tongti army general ka puogo.
“Third Army commander General Erdal Ozturk puogo” ta Turkish ketdangser kati ashi.
“Tensa azüoktetogo aser sorkar atsüngdoktsü merangertem ozüng tapet agi merenshitsü” ta Prime Minister Binali Yildirim-ia metetdaktsü.
Turkish army-ia parnok züngsemtem rongnung tebilemba balaka nung inyakertem ajak agientsü ta metetdaktsüogo.
Sorkar atsüngdoktsü meranger parnok 104 tashi tepsetogo aser ashioktsürtem merenshitsü, ta acting Army Chief Umit Dundar-i ashi.
Ano, Turkey nung judicial board tematibai obendanger  2,745 tashi mapa nungi anentsüogo. Parnok ajak ya Hokolbarnü sorkar atsüngdoktsü merangba mapa nung aija anentsü. Obendangertem rongnung court of first instance judges 541 aser judicial court judges 2,204 lir.
July 15 nü Turkey nung mitkartemi sorkar atsüngdoktsü merang aser iba mapang parnok rongnungi nisung 165 tashi tepset, ta Prime Minister Binali Yildirim-isa ashi.
Iba mapa nung shilem agiba sepai 2,839 tashi puogo aser parnok rongnung tongti ketdangsertem dena lir, ta paisa shisem.
Tanü tashi nung Turkey-i sorkar atsüngdoktsü meranger nisung 6,000 den tema puogo aser maneni aibelenertem aputsü, ta Deobarnü , Justice Minister Bekir Bozdag-i metetdaktsü.
Sorkar atsüngdoktsü merangba mapa tamakok anguba sülen sepai 8 tashi helicopter ka nung mener Greece-i jena aoertem ketdangsertemi pua lir, ta Deobarnü Greece ketdangser kati ashi.
Alexandroupoli nung okadak ka nung prosecutor Anna Nikitopoulos-i Turkey nunger sepai ti dang parnok ozüng alema Greece telungi aitba atema tai tongloktsüba onüktem zünga metetdaktsü aser parnok obendang ka magütsü tashi tepuokdak ayutsü atema tetuyuba agütsü.
Par ti atema okatsür, Menia Polihroni-i ashiba agi, “Parnoki ozüng alema Greece telung aibaji memelenshi lir, saka tanabuba onük melenshiogo. Parnok rongnung nisung ka ozüng alema tayimtsü aniba atema aitsür aser tanüngba 7 ji ozüng alema anitsü ajungmesoba atema aitsür.”
“Turkey aser Greece tsüngda tesentaktep raksatsü ta tai tongloktsüba onükbo agienogo” ta laisa shisem.