Turkey nung emergency ozüng benokogo

Istanbul, July 21 (Agencies): Turkey linük ajunga nung ita 3 tashi emergency ozüng benokba osang ka Turkey Tir, Tayyip Erdogan-i yashi, Bodbar nü sangoktsüogo.
Turkey mitkar telok kati tashiyim agi linük yimsüsütsü tashi tamakok ngua agitsü merangba sülen Turkey sorkar anemertem ajemreptsü nükjidong nung Turkey sorkari tan par linük nung emergency ozüngji benoker lir.
Tan mitkar teloki yimsüsütsü tashi agitsü merangba ken o nung ajemdaker Turkey sorkari mitkar züngsemtem, o bendanger aser sorkar mapa balala nung inyaker pua ayuba sülen maneni par linük nung emergency ozüng benoktsü tenzüker lir.
Turkey linük nung emergency ozüng benokba ajanga Tir Erdogan aser pai aniba Cabinet yimsüsürtemi parliament ajangdanga nungdakba temzüng ozüng tasen yanglua kasaji mapa küma benshitsü temten angur lir.
Ano, emergency ozüng benokba ajanga nungdakba mapang nung nüburtem rong nungi temetena agientsü tashi angur lir.
Par National Security Council den ghonda 5 shi agia senden amenba sülen Erdogan-i par Turkey linük nung emergency ozüng benoktsü lemtetba osangji  sangdong.
“Democracy yimsüsütsü yimya anemertem tekaratiba mapang nung ajemreptsü nükjidong nung Turkey linük nung ita 3 tashi emergency ozüng benoktsü renemogo,” ta pai sangoktsü.
Turkey mitkar telok kati linük indang yimsüsütsü tashi tashiyim agi taoba Hokolbar nü agitsü merangba sülen Turkey sorkari mitkar, police, o bendanger, school tesayur aser sorkar mapa inyaker nisung 60,000 shi tanü tashi nung pua aliba mesüra parnok anema bushisüngdang tenzükba osang bushiteta lir.
“Tan mitkar telok kati ozü linük indang yimsüsütsü tashi tashiyim agi agitsü merangba maparen nung ni anemer bendangertemia tongti shilem agia alitsü akok,” ta par linük emergency ozüng benokba osang sangoktsüba jakdang Erdogan-i temulung malemba olen ka metetdakja liasü.
“Tan emergency ozüng benokba ajanga Turkey nüburtemi tesüiba mapang ajurushiba amabo timtem toushi majurutsü ta nangzüker. Asen Turkey linük ya teti atema democracy linük alitsü,” ta pai nüburtem temulung sunepja ashi.
Erdogan-i aniba Turkey sorkari sorkar anemer ajemreptsü tatemtsü bener par  tashi tali amshitsü tenzüker ta shia, Turkey-i aibelener nem temzüngi melaba ama temerenshitsü agütsütsü tajungshiba olen ka Turkey pusemba West lenirtemia Erdogan dang metetdaktsüogo.