Turkey nung IS tanur kati bomb amshia amakdang nisung 51 pokset

Turkey kübok Gaziantep nung kiyimba sentong ka nung bomb apokba sülen ambulance tem aruba noksa nung angur.

Istanbul, August 21 (Agencies) : Islamic State telok nungi ‘suicide bomber’ kati Turkey kübok Kurdish nunger kiyimba sentong ka amakdang nisung 51 pokset aser aika yirua lir, ta Turkey president, Recep Tayyip Erdogan-i Deobarnü metetdaktsü.
Iba lendong ya yasüng Syria den arrtsü anasa aliba Gaziantep nung atalok aser taküm Turkey nung kiralongraba mapa inyakba rongnung iba ya tamajungtiba lir.
Tir Erdogan-i ashiba agi, pei mang nung bomb bener arua pokseterji arishi küm 12 nungi 14 tsüngda tanur ka liasü aser lendong nung nisung 69 yirua alibatem rongnung parnok 17 kanga mejungi lir.
“Gaziantep nung ISIS telok tenteta lir mesüra parnoki iba tesem nung telok tentettsü atema mapa inyaker asütsü akok” ta Erdogan-isa metetdaktsü.
“Gaziantep nung operation aika agiogo, maneni agidar aser ano ozü security forces-i mapa tuluba nung inyaktsü” ta Turkey tir-isa shisem.
Turkey nung tesüiba küm ka tsüngda kiralongraba mapa kanga bulua inyaka arur aser item tatalokba asoshi Kurdistan Workers’ Party den sendaktepba aliba Kurdish telungpurtem (PKK) mesüra IS nem tai tonglokja arur.
Taküm June ita IS kiralongrartemi Istanbul nung airport tongtiba amakdang nisung 44 tepset. Ano, yaküm October ita linük yimtiba Ankara nung yimjung rally ka nung bomb ana pokdaktsüdang nisung 103 pokseta liasü aser iba mapaji IS nem tai tongloktsü.
Taoba ita nisung kari Turkey nung Tir Erdogan’er sorkar atsüngdoktsü merangba sülen linük makmakshika aliba mapang ka nung yasüng iba lendong atalokogo. Sorkar atsüngdoktsü merangba inyakyim tamakok angu aser iba mapa ya US nung aliba Muslim cleric Fethullah Gulen aser pa sülen anidakertemi inyak ta sorkari aitsür, saka Gulen-i ibaji magizüker.
Tir Erdogan-i “IS, Kurdish telungpurtem aser Gulen’er telok tsüngda tepila kecha mali, kechiyong parnok ajak ya kiralongrartem lir” ta metetdaktsüogo.