Turkey nung PM Yildirim indang advisor apu

Ankara, June 3 (Agencies): Turkey Prime Minister Binali Yildirim indang chief adviser Honibarnü puogo. US nung amenoka aliba Muslim putir Fethullah Gulen den tesentaktep lir ta temulung melemi bilemba atema pa apu.
Birol Erdem ya taoba justice ministry ketdangser ka liasü aser pa den Gulumser Erdem na Ankara nung apu, ta Anadolu news agency ajanga metetdaktsü.
Gulen-i aniba telok nung pa züngsem ka liasü ta tai tongloktsü, ta parnokisa ashi.
Turkey sorkari ashiba agi, yaküm July 12 nü Tir Recep Tayyip Erdogan atsüngdoktsü atema Gulen-i tetuyuba agütsü.
Gulen ya 1999 nungi US kübok Pennsylvania nung liyonga arur aser Turkey sorkari pa dak tai tongloktsübaji pai magizüker.
Gulen den tesentaktep lir ta temulung melemi bilemba sorkar ketdangser tejentem rongnung Erdem ya la lir. Erdogan indang aide-de-camp Colonel Ali Yazici dena tanga tongti ketdangser aika sorkari pua lir.
Yaküm sorkar atsüngdoktsü merangba sülen nungi sorkari nisung 50,000 dak tema puogo. Parnok rongnung obendangertem, okatsürtem, police ketdangsertem aser armed forces nung züngsemtem dena lir.
Parnok Gulen den tesentaktep lir ta tai tonglokja lir, ta justice ministry ketdangsertem taoba hopta osangbener dang ashi.
Maneni, Turkey nung doctors, civil servants aser academics dena public sector nungi nisung 100,000 dak tema Gulen den tesentaktep aliba atema tai tonglokja mapa nungi anentsüogo.