Turkey nung taküm tenla agüja bomb pokdaktsür kabo jangjaogo

Ankara, October 19 (Agencies): Turkey Ato Kilonser Ahmet Davutoglu-i, Ankara yimti nung October 10 nü pei taküm tenlaa tapoktsü pokdaktsür ana rongnung kabo jangjaogo, ta Hombar nü metetdaktsü.

State meyong A Haber TV den mezüng interview agiba mapang Ato Kilonser Ahmet Davutoglu-i, iba lendong agütsürtem jangjatsü asoshi bushisüngdangdar, ta ashiba Xinhua news agency ajanga metetdakja liasü.

Ankara yimti nung pei taküm tenlaa tapoktsü pokdaktsür nisung anati tapoktsü tesashi pokdakja lendong agütsüba mapang nisung noklang ka ser ana tashi taküm samatsü. Iba lendong ya tanü asüng tensa nung Turkey linük nung atalokba lendong rongnung tamajungba ka lir.

Linük nung parliamentary election November 1 nü agitsü aliba jangjungtsü asoshi iba lendong ya agütsüogo ta temulung melemi bilemer.

Ato Kilonser Ahmet Davutoglu-i, iba bomb lendong dak sentakba nung nisung ter ser pongu pua lir, ta ashi.