Turkey o Russia nati amaliteptsü nangzükteper

Turkey police telok nung züngsemer, Mevlut Mert Altintas-i Turkey yimtiba, Ankara nung tentetba photo gallery ka nung Russia’er Turkey Ambassador, Andrei Karlov injang agi kasetba sülen agiba noksa ka yangi angur. (Ankara, December 20)

Ankara, December 20 (Agencies): Turkey aser Russia linük nati amalitepa kiralongrar anema raratsü atema tanü, Mongolbar nü nangzüktepogo.
Turkey police ketdangser kati Russia’er Turkey Ambassador, Andrei Karlov yashi, Hombar nü injang agi kaseta lendong atalokdaktsüba sülen par linük anati amaliteptsü nangzüktepa liasü.
Turkey yimtiba, Ankara nung tentetba riot police squad nung züngsemer, arishi küm 22 tain Mevlut Mert Altintas-i Syria pusemtsü ola tulu adoka, Karlov Ankara yimti nung tentetba art gallery ka nung yimjak ma nung kasetba osang jangjaogo saka pai kechi mechi Karlov-ji kaset iba osangbo tang tashi mebushiteti lir.
Turkey Foreign Minister, Mevlut Cavusoglu aser Russia Foreign Minister, Sergei Lavorv nati Moscow yimti nung Syria den sentakba onük benoka jembitsü tenzükba mapang ka nung tan lendongji ataloker lir.
Ajisüaka, “Tan Karlov kaseta lendong atalokdaktsüba ajanga ozü linük ana tsüngda tesendaktep meraksatsütsü,” ta shia, par linük anati aroki lungjemer kiralongrar anema takok ngua raratsü nangzüktepba olen ka Cavusoglu-i tanü metetdaktsü.
“Turkey o Russia nati amalitepa nungdakba maparen takok ngua inyaktetter ta alima dang jungkai adoka sayuogo aser tarutsü mapanga ozü linük anati maneni amalitepa inyaktettsü,” ta par linüka anati ayonger külen Syria Tir, Bashar al-Assad-i aniba Syria sorkar aser sorkar anemer na tsüngda Syria kübok Aleppo yimti nung tongpang rarabaren anendakja, iba yimti nung alirtem taküm kümzüka anitettsü tenzükba indang shia, Cavusoglu-i tanü iba olenji sangoktsü.
“Tan Russia’er Turkey ambassador kaseta lendong atalokdaktsüba ajanga ozü linük anati tarutsü mapang nung tali lungjemshir kiralongrar anema raratsü mulungtetdaktsüogo,” ta Turkey Tir, Recep Tayyip Erdogan aser Russia Tir, Vladimir Putin natia metetdakja liasü.
Altintas-i Karlov kasetba sülen Turkey police den injang yoka katepdang, polic-i pa kaseta liasü.
Ano külen, Turkey police-i US Embassy ki kimalen injang kadoka, tensa mejungi kümdaktsütsü meranger prangpong abener nisung ka pua ayuba osanga jangjaogo.