Turkey: Pokshiba lendong tesashi ka atalok; 5 pokset, 39 yiru

Turkey: Pokshiba lendong tesashi ka atalok; 5 pokset, 39 yiru

Turkey southeast tsütsülen, Diyarbakir province kübok Cinar jila nung pokshiba lendong ka yasüng atalokba sülen Turkey police aser rescue ketdangsertemi lendong atalokdak bushisüngdangba noksa nung angur. (Cinar, January 14)

 Istanbul, January 14 (Agencies): Turkey southeast tsütsülen tentetba police station aser kidangsüa tentetba police ketdangsertem alidak pokshiba lendong tesashi ka Kurdish telungpurtemi yasüng, Bodbar aonung atalokdaktsüba osang ka provincial governorate-i tanü Brehostibar nü metetdaktsüogo.

“Kurdistan Workers Party (PKK) telungpurtemi Cinar jila nung atalokdaktsüba lendong nung nisung 5 poksetba aser nisung 39 shi yiruba osang tang tashi nung jangjaogo,” ta Diyarbakir province Governor’er office-i sangoktsü.

Car gari nung alenokba bomb pokdaktsüdang nisung 2 pokset aser tanüngba nisung 3-ji pokshiba lendong atalokba ajanga jireptsüba ki anenset ta osang jangjashitsü.

Tan lendong nung police ketdangser aser nübur naprongla yiruba osang jangjaogo saka tan asürtemjibo nübur dang aliba osang jangjaogo.

Governor’er office-isa ashiba agi, pokshiba lendong nung nisung 14 yiru aser ki jirepdang nisung 25 shi anenbang.

Telungpurtemi car gari nung alenokba bomb pokdaktsüba den külemi, prangpong injang aser rocket bomb kalokja yasüng amakba osang bushitetogo.

PKK telungpur teloki tesüiba mapang, 1984 küm nungi tenzüka Turkey sorkar anema nokdaktsü tenzükba ajanga tanü tashi nung tai maketba nisung meyirijang jenti tepsetba osanga bushiteta lir.

Turkey mitkartemi yaküm, 2015 küm July ita nungi tenzüka Turkey southeast tsütsülen densemba tesem nung PKK telok mita parnok arishitsü tenzüka lir.

Turkey Tir, Recep Tayyip Erdogan-ia PKK züngsem ajunga meshimeshia samatsütsü tenangzükba olen ka yaküm November ita sangoktsüogo.

Turkey sorkar den külemi, United States aser European Union (EU) nati PKK telok ka kiralongrar telok ta züngshir.

You must be logged in to post a comment Login