Turkey: Police-i nisung 4 apu; mitkartemi PKK telok amak tenzüker

Turkey yimtiba, Ankara nung bomb lendong tesashi ka yashi, Deobar nü atalokba sülen emergency services ketdangsertemi lendong atalokdak mapa inyakba noksa nung angur. (Ankara, March 14)

Ankara, March 14 (Agencies): Turkey mitkartemi par tayimtsü amshia Kurdistan Workers Party (PKK) telungpur teloki Iraq anüdoklentiptsütsülen tentetba teseptem amak tenzükogo.
Turkey yimtiba, Ankara nung ishiba agi nisung 37 shi poksetdakja yashi lendong tesashiba ka atalokdaktsüba sülen iba lendongji PKK teloki atalokdaktsü ta temulung melemi bilema, Turkey mitkar tayimtsütemi PKK teseptem 18 ben tashi tanü, Hombar nü amakba osang jangjaogo.
Ajisüaka, PKK teloki yashi lendong atalokdaktsüba kuli tanü tashi bushiteta maliba den külemi, yashi lendong atalokdaktsüba atema telok shingaia tang tashi nung tenüng agia metetdakja mali.
“PKK telungpur telok ajunga meshimeshia mesamatsü tashi par telok anema raratsü,” ta Turkey Tir, Recep Tayyip Erdogan-i nangzükba sülen yaküm July ita nungi tenzüka Turkey mitkartemi PKK telok mita arishiba osanga bushiteta lir.
“Yashi lendongji bendang linüktem embassy ki tentetdak aser Turkey sorkar ki alidak anasa, Kizilay square tsütsülen atalok. Yashi lendong nung nisung 120 dak tema yiruba osanga tang tashi nung jangjaogo,” ta Turkey Health Minister, Mehmet Muezzinoglu-i tanü metetdaktsü.
Yashi lendong atalokba sülen Turkey Ato Kilonser, Ahmet Davutoglu-ia rongdak senden ka jatepa tarutsü mapang nung par Turkey tan atalokba amala lendong balala nungi kümzüka ayutsü azüngashitepa liasü.
Ano, yashi lendong ataloktsür rong nung PKK nung züngsemer tetsür ka densema aliba osang bushitetba osang ka sorkar ketdangsertemi tanü metetdaktsüogo.
Yashi lendong atalokdaktsüba ken o nung ajemdaker police-ia temulung melemi bilemba nisung 4 tashi apuba osang ka tanü metetdaktsü.
Par 4-ji Syria arrtsülen, Sanliurfa yimti nung apuba sülen Ankara tonga anir aoba osang jangjaogo.