Turkey sorkari civil servants 4,400 mapa nungi anentsü

Istanbul, February 8 (Agencies) : Turkey nung civil servants 4,400 dak temai kiralongrar teloktem den tesentaktep ayuba atema tai tonglokja mapa nungi anentsüogo.
Parnok rongnung tesayurtem, police ketdangsertem aser shisashirtem dena lir.
Turkey President, Tayyip Erdogan nem tashi talila agütsütsü atema mapa inyakba magizüker constitution professor Ibrahim Kaboglu-a mapa nungi anentsürtem rongnung dena lir.
Sorkari civil servants 4,464 mapa nungi anentsüba nung Court clerks, computer experts aser librarians dena liasü.
Yaküm July ita nisung kari Turkey nung sorkar atsüngdoktsü merang aser iba ya US nung amenoka aliba Islamic cleric Fethullah Gulen-i ketdangsüa inyak ta sorkari aitsür. Ajisüaka, Gulen-i ibaji magizüker.
Yaküm July atalokba sülen Turkey sorkari nisung 125,000 dak tema mapa nungi anentsüogo aser nisung 40,000 shi puogo.
Turkey sorkari Kurdish telungpurtem anema mapa inyakba atema yaküm academics aikati iba mapa aija tezüluba ka nung sign asü. Iba mapang President Erdogan-i academics temi ashioktsüba atema merenshitsü ta amokmerena liasü.
Tang mapa nungi anentsür academics 330 ji yaküm sign asürtem rongnung dena liasü.
July 2015 nungi Kurdistan Workers Party (PKK)-i Turkey nung ozüng alema mapa inyaktsü tenzük. Turkey, United States aser European Union-i iba telok ya kiralongrar telok ka ta züngshir.