Turkey Southeast nung nisung 3 pokset; 30 dak tema yiru

Turkey southeast tsütsülen, Midyat jila nung PKK telungpur teloki pokshiba lendong ka atalokdaktsüba sülen van gari ka kanga mejungi poksar aliba noksa ka yangi angur. (Midyat, June 08)

 Midyat, June 08 (Agencies): Kurdish telungpurtemi Turkey southeast tsütsülen bomb lendong tesashi ka tanü, Bodbar nü atalokdaktsüba osang ka Turkey Ato Kilonser, Binali Yildirim-i metetdaktsüogo.

“Midyat jila nung atalokba bomb lendong nung nisung 3 poksetba aser nisung 30 dak tema yiruba osang tang tashi nung jangjaogo,” ta pai osang jangjashitsü.

Mejangtetba nisungtemi car gari nung alenokba bomb Istanbul yimti nung pokdakja lendong kanga sashia atalokdaktsür anogo tanabuba nung Midyat jila nunga bomb lendong ataloker lir.

Midyat nung lendong atalokba sülen Kurdistan Workers Party (PKK) telungpur aser Turkey mitkar na tsüngda tongpanga raraba osang jangjaogo.

Tanü lendong atalokdakji Syria arrtsülen tentetba jila ka lir aser iba tesem nung PKK telungpurtemi taoba küm 30 tejaklen nungi tenzüka Turkey mitkartem den tongpang kanga sashia raraba osang bushiteta lir.

Ano, kidangsüa aliba Syria nung tongpang kanga sashia raraba ajanga Turkey nunga tensa mejungi akümba osang bushiteta lir kechiyong Turkey den pusema, European Union (EU) aser US nati kiralongrar telok ta züngshiba PKK telok ya Syria nung tentetba Syrian Kurdish YPG telungpur telok den tesendaktep junga ayuba telok ka lir.

“Kiralongrartemi lendong aiben atalokdakjaka, ozü Turkey linük teti lungjema alitsü ta ajaki angatettsüla. Ano, ozü Turkey-ia kiralongrar anema tatem tashi raratsü renema lir,” ta Yildirim-i tanü lendong nung yirurtem den ajurutepdang sangoktsü.

Ano külen, yashi Istanbul yimti tiyongtsülen nisung 11 tashi tepseta lendong atalokdaktsüba atema telok shingia tanü tashi nung tenüng agia metetdakja mali.