Turkey Tir, Erdogan aser Obama nati amaliteptsü nangzükteper

Istanbul, October 16 (Agencies): Turkey Tir, Recep Tayyip Erdogan aser US Tir, Barack Obama nati telephone ajanga tongtepratepba sülen par linük anati Islamic State (IS) kiralongrar anema raraba maparen amalitepa inyaktsü nangzüktepba osang ka Erdogan’er office-i tanü Hokolbar nü metetdaktsüogo.

Ano, Russia-i par mitkar züngsem aser tongpang nung amshitsü osettsüset Syria-i yoka Syria tongpang nung tongti shilem agidaktsütsü tenzükba den sentakba onüka lenir anati benokba osang jangjaogo.

“Ozü linük anati külemi lungjemer mitkar tashi amshia IS telok anema raratsü aser Syria-ia ajuruba mangatettep ken o benteta yimji yimjung lidaktsütsü asoshi yimtenren tebentetbaren bener arutsütsü onük Turkey Tir, Erdogan den benoka jembiogo,” ta Obama-ia tanü osangbener dang metetdaktsü.

Turkey kübok Ankara nung bomb lendong 2 tashi taoba Honibar nü atalokdakdang nisung asüba atema sasaba olen ka lemsatepba den külemi, Turkey-i ajurushiba lendong timtem ajunga nung par US-i Turkey linük nungita yaritsü mulunga aliba olen ka Obama-i Erdogan den lemsatepba osanga jangjaogo.

Ano, Turkey sorkar anemba Kurdistan Workers Party (KWP) teloki Turkey nung lendong atalokdaktsüba maparen tekaraba mapang nung anentsütsü onüka lenir anati benoka jembia liasü.

Afghanistan nunga yimji yimjung tia lidaktsütsü asoshi par linük anati külemi lungjemer nungdakba maparen maneni inyaktsü asoshi tenati nangzüktepba osang jangjaogo.