Turkey Tir, Erdogan-i migrant ken o nung EU aitsür

Canakkale, March 18 (Agencies): European Union (EU)-i migrant nisungtem, nübur nem agütsüba temeten aser kiralongrar anemtsü maparen nung anemsü agi inyaker ta shia, Turkey Tir, Tayyip Erdogan-i EU aitsüba olen ka tanü, Hokolbar nü metetdaktsüogo.

Turkey kübok Canakkale nung agiba World War I tongpang mapang raraba Canakkale tongpang rarar küm 101 ajungba bilemtetba sentong nung onük jembidang Erdogan-i tanü iba aitsüba olenji metetdaktsü.

Turkey Ato Kilonser, Ahmet Davutoglu-i EU lenirtem den Belgium yimtiba, Brussels nung ajurutepa migrant nisungtem den sentakba tongti senden ka amenba mapang ka nung Erdogan-i tan EU aitsür lir.

Migrant nisungtem temeten kümzüktsü nükjidong nung Turkey-i par linük temzüng melenshia yanglushitsü aser Turkey sorkari osangbener aser sorkar anemer ajemrepa ayutsü merangba maparen anentsü asoshi EU-i ajungshiba nem telangzüba agüja, Europe-i metetsümonga aser memeteti kiralongrar teloktem pusema nungitba ajanga parnoki “Ali telung nung pokshitsü oset aremba alu nung tsüngsanger,” ta Erdogan-i sangoktsü.

Ano, Europe-i peisasa inyakba migrant nisungtem den sentakba maparen tamasa reprangshiba sülen ang par Turkey indang inyakyim melenshitsü ajungshitsü olen ka Erdogan-i metetdaktsü.

“Turkey linük tajangzük angutsü nükjidong nung masü saka migrant nisungtem taküm jenjang tajungba kümdaktsütsü nükjidong nung ozü Turkey-i EU den migrant nisungtem den sentakba tezüngzüktep agitsü alizüng yua lir,” ta Davutoglu-i EU lenirtem den senden amenba jakdang metetdakja liasü.

Turkey linük nem senotsü teyari agütsütsü, Turk nisungtem visa mebeni Europe nung senzütsü temeten agütsütsü aser Turkey EU nung züngsemdaktsütsü maparen tekaraba mapang nung inyaktsü melena Turkey-i Greece nung ozüng alema jenokba migrant nisungtem par linük nung jenokdaktsütsü asoshi EU-i onük benoka lir.