Turkey Tir, Erdogan-i school 1,043 shi shibangtsüogo

Turkey Tir, Tayyip Erdogan-i pa pusemertem den Ankara yimti nung ajurutepdang agiba noksa ka yangi angur. (Ankara, July 23)

Ankara, July 23 (Agencies): Turkey Tir, Tayyip Erdogan-i par Turkey nung benokba emergency ozüng tashi amshia, nija nisung aser tentettemi tentetba school, nübur yariba tentet aser iba ama tongti tentet meyirijang aika shibangtsü ozüng tanü, Honibar nü agütsüogo.
Turkey mitkar telok kati par linük indang yimsüsütsü tashi tashiyim agi tamakok ngua taoba hopta agitsü merangba sülen Erdogan-i aniba Turkey sorkari par linük nung ita 3 tashi emergency ozüng benokba osang tan Bodbar nü sangoktsü aser tan tentet balala shibangtsüba ya par linük emergency ozüng benokba sülen Erdogan-i tan mezüngsüa emergency tashi amshir lir.
Ano, ozüng alema inyaker ta temulung malemba nisungtem anogo 4 nungi anogo 30 tashi pua ayutsü tashi benokba osang Erdogan-i sangoktsüogo.
Turkey mitkar lenir melenshia mitkar tali tashi itdaktsütsü nükjidong nung Erdogan-i tan July ita 28 nü senden amentsü asoshi par Supreme Military Council (YAS) jaokba osanga angazükogo.
Mitkar teloki tajemba agi nisung 246 shi tepseta linük yimsüsütsü tashi tashiyim agi agitsü merangbaji US nung jenoka alir Muslim putir, Fethullah Gulen-i ajungemesoa inyak ta shia, Erdogan-i Gulen aija lir.
Turkey sorkar anemer ajemreptsü nükjidong nung emergency ozüng benokba sülen Erdogan-i school 1,043, nübur yaritsü tentet 1,229, shishilembatsü tentet 19, university15 aser mozümora tentet 35 shi Gulen aser pai aniba Gulen telok yariba ken o nung ajemdaker shibangtsüba osang jangjaogo.
Ano külen, Gulen US nungi Turkey linüki anir aotsü maparen anogo 10 tsüngda nung tembangtsü alizüng ayuba olen ka Turkey Foreign Minister, Mevlut Cavusoglu-ia tanü metetdaktsüogo.