Turkey Tir, Erdogan-i West lenirtem aitsür

Istanbul, May 09 (Agencies): West linük lenirtemi par mitkar tashi amshia Syria anüdoklentip tsütsülen desenemba tesemtem nung Islamic State (IS) kiralongrar anema rarar saka Turkey sorkari par linük tentetba jihadist kiralongrar anema rarabaren nungbo meyariteper ta shia, Turkey Tir, Recep Tayyip Erdogan-i West linük lenirtem aitsüogo.
“Pokshiba lendongtem atalokdakja ozü Turkey linük nung lendong atalokdaktsür IS telok anema raratsüren nungbo West linüktemi ozü Turkey sorkar den meyariteper,” ta Erdogan-i mepelai ashi.
Syria arrtsülen tentetba Kilis jila nung IS teloki taoba hopta tsüngda nung nisung 20 dak tema tepsetba kepzüka, Turkey mitkartemi pokshitsü tongpang oset kalokja Syria anüdoklentip tsütsülen tesep tenteta alir IS züngsem 55 shi tepseter anogo ka lir külen Erdogan-i iba mepelaba olenji sangoktsü.
Mitkar lenirtemi ashiba agi, Turkey mitkartemi par pokshitsü tongpang osettemji Syria kübok Aleppo yimti nung atsüka alir IS züngsemtem rong nung kaloktsü aser IS züngsemtem tepsetba den külemi, par teloki idakji amenokba rocket kadokdak 3 tashi poksatsü.
Erdogan-i tan mepela olen lemsatepba ya par linük aser European Union (EU) na tsüngda mangatettep adokba maneni yimjak nung jungkai adoka sayur lir.
Turkey-i kiralongrar anema raratsü asoshi latetba ozüng kanga sashia mamshitsü asoshi EU-i ajungshia lir.
Ajisüaka, Turkey-i IS den külemi, Kurd kini tentetba telungpur telok den sentakba khuret benoka lir ta shia, Erdogan aser pai aniba Turkey sorkari EU-i benokba tajungshiba olenji magizüki lir.
Turkey aser EU na tsüngda tangatettep kati marutetba ajanga Turkey-i linük 28 züngsemba EU nung züngsemtsü maparen tanü tashi takok ngua magiteti aliba osanga jangjaogo.