Turkey Tir, Tayyip Erdogan-i PKK telok aitsür

Turkey tiyongtsülen, Kayseri yimti nung mitkar züngsemtem aniba bus ka nung bomb pokdakja lendong atalokdaktsüba sülen Turkey police ketdangsertemi lendong atalokdak par bushisüngdang mapa inyakba noksa nung angur. (Kayseri, December 17)

Ankara, December 17 (Agencies): Turkey tiyongtsülen, Kayseri yimti nung bomb lendong atalokdaktsüba ken o nung ajemdaker Turkey Tir, Tayyip Erdogan-i Kurd kin nisungtemi tentetba kiralongrar telok tanü, Honibar nü aitsüogo.
Turkey mitkar züngsemtem aniba bus gari ka nung bomb pokdakja, tanü lendong kanga sashia atalokdaktsü aser iba lendong nung mitkar züngsem nisung 13 poksetba aser nisung 55 shi yiruba osang tang tashi nung jangjaogo.
Tan lendong atalokdaktsüba ajanga Kurdish kiralongrar telok, Kurdistan Workers Party (PKK) kiralongrartemi küm 30 shi Turkey sorkar anema nokdaka lendong kanga sashia ataloktsüdak, Tureky southeast tsütsülen densemba tesemtem nung tensa kanga mejungi kümdaktsütsü akok.
“Turkey sorkar tashi meiti kümdaktsütsü nükjidong nung PKK teloki tan lendong atalokdaktsüogo. Tan lendong atalokdaktsübaji kidangsüa aliba Iraq aser Syria na den sendaktepa lir aser tan lendong atalokdaktsüba atema PKK telok kanga sashia aitsür,” ta Erdogan-i sangoktsü.
Turkey nung alir Kurd kin nisungtem aliba tesemtem nung peisasa pei madak yimsü asütsü temeten tuluba agütsütsü atema nokdaker PKK telok ya Turkey densema, United States (US) aser European Union (EU) nati kiralongrar telok tan züngshir.
Tanü lendong atalokdaktsüba atema telok shingaia tang tashi nung tenüng agia metetdakja mali saka tan lendongji PKK’er kongsang telok kati Istanbul yimti nung taoba Honibar nü bomb lendong atalokdaktsüba den sentaktepa alitsü akok ta Turkey Deputy Prime Minister, Veysi Kaynak-ia temulung malemba olen ka metetdaktsüogo.
“Tan lendong atalokbaji Istanbul yimti kübok Besiktas Stadium nung taoba hopta atalokdaktsüba lendong mesüka lir aser tan lendong ya PKK telok mapa asütsütsü akok,” ta pai shisem.
“Ozü Turkey-i kiralongrar aser telungpur anema taoba mapang nungi tesashiba raratsü nangzüker,” ta Turkey Defence Minister, Fikri Isik-ia metetdaktsüogo.