Turkey Tir, Tayyip Erdogan-i Russia aitsür

Ankara, May 30 (Agencies): Turkey Tir, Tayyip Erdogan-i Russia sorkar aitsüba olen ka tanü, Hombar nü metetdaktsüogo.
“Russia sorkari Turkey nung ozüng alema tentetba Kurdistan Workers Party (PKK) telok nem rocket aser tayimtsü dak akaba tongpang oset agüja yariba atema aitsür,” ta pai ashi.
Turkey southeast tsütsü, Diyarbakir province nung tentetba tayimtsü anendak tasen ka lapoktsüba sülen par Ankara yimtibai tanaben meyipdang Erodogan-i iba aitsüba olenji sangoksü.
“Russia-i Iraq aser Syria na ajangdanga, PKK telok nem tongpang nung amshitsütsü osettsüset agüja yariba sülen PKK teloki item tongpang osettemji Turkey sorkar mitkartem anema amshia tongpang raratsü tenzükogo,” ta pai shisem.
Küm 30 shi tejaklen nungi tenzüka, PKK teloki Turkey sorkar anema nokdaka, Turkey mitkartem den tongang raraba ajanga PKK züngsem timba densema, tanü tashi nung nisung 40,000 dak tema asüba osang bushiteta lir.
Erdogan-i taoba mapanga Russia dang mepelaba olen metetdakja aru saka pai tan mezüngsüa Russia aitsür lir.
Turkey den pusema, US aser European Union (EU)-ia Turkey anema nokdakba PKK telok ya kiralongrar telok ta züngshir.
Ajisüaka, par Turkey aser Russia na tsüngda tesendaktep tajungba akümtsü imlaba olen ka Turkey Deputy Prime Minister, Numan Kurtulmus-i tanü metetdaktsüogo.
“Ozü Turkey o Russia na tsüngda tanaben sentaktepshia tesendaktep tajungba akümtsü imlar,” ta pai nenshia ashi.
Turkey mitkartemi par lushi telungi aita anüng nung ayimba Russia’er mitkar tayimtsü ka anüng nungi yaküm, 2015 küm kazüka yokba sülen par linük ana tsüngda taoba mapang nungi tawa tesendaktep tamajungba akümtsü tenzük.