Turkey Tir, Tayyip Erdogan-i Somalia linük semdang

Turkey Tir, Recep Tayyip Erdogan (Tiyongtsü, microphone amer)-i Somalia yimtiba, Mogadishu nung tentetba Turkey’er embassy ki tasen lapoktsüdang agiba noksa ka yangi angur. (Mogadishu, June 04)

Mogadishu, June 04 (Agencies): Turkey Tir, Recep Tayyip Erdogan-i Somalia linük yashi, Hokolbar nü semdangba osang jangjaogo.
Somalia nung tentetba al-Shabab telungpurtemi Mogadishu yimtiba nung tentetba Ambassador Hotel nung amakba lendong atalokdakja ishiba agi nisung 24 tashi tan Bodbar nütu tepset.
Aji oda, Mogadishu nung lendong atalokaka, Erdogan-i sentong renemba ama Mogadishu tasüng, Hokolbar nü semdanga liasü.
Erdogan-i tan Somalia semdangdang par linük ana tsüngda police ketdangsertem nem terenemshiba agütsütsü, kaketshisatsü bushitsü aser energy tashi den sentakba tongti tezüngzüktep ishika zülutepa agiogo.
Erdogan-ia Mogadishu nung tentetba Turkey’er embassy ki tasen ka tan lapokja liasü.
Tan lapoktsüba ambassy kiji Turkey linüki alima tesem balala nung renemba embassy ki rong nung tulutiba aliba osang jangjaogo.
Somalia anülulentip tsütsü densemba tesemtem nung ayawara tia kanga sashia ajura alidang, 2011 küm August ita semdangba sülen Erdogan-i tan agi Mogadishu tasembenbuba semdanger lir.
Turkey linüki 2011 küm nungi tenzüka tanü tashi nung nübur o nübur na tongpang kanga sashia raradak, Somalia nem teyari sen dollar sen million noklang aika agüja yariba osang bushitetogo.
Taküm 2016 atema Somalia nem teyari sen dollar million 24 tashi agütsütsü onüka Turkey’er cabinet yimsüsürtemi taoba hopta agizükba osanga jangjaogo.
Erdogan-i tan Somalia semdangba jakdang Uganda aser Kenya na semdanga liasü.