Turnbull-i Australia Ato Kilonser inyaktsü tenangzükba agiogo

Canberra kübok Government House kilung nung Australia Governor-General, Sir Peter Cosgrove (Achijilen)-i Malcolm Turnbull (Tiyongtsü) nem Australia Ato Kilonser tasenba akümtsü tenangzükbaren tanü Mongolbar nü agütsüba noksa nung angur. (Canberra, September 15)

Canberra, September 15 (Agencies): Malcolm Turnbull-i Australia Ato Kilonser tasenba inyaktsü tenangzükba tanü Mongolbar nü agiba sülen küm 2 tsüngda nung Australia Ato Kilonser inyaker 4 buba kümogo.

Par Liberal Party yimtenren teloki yashi Hombar nü ajungbena vote agitsü sentong ka agiba sülen Turnbull-i Tony Abbott den temaba jenjang ngua Ato Kilonser tasenba akümtsü jenjang angu.

“Ni Australia Ato Kilonser menden abentsü ta kodanga mebilemi liasü. Ajisüaka, kü nem iba maongka tajung agütsüba atema kanga pelar. Kü dak temulung alemba ama, ni asen Australia linük tejakleni bener aotsü nangzüker,” ta taoba mapang banker, okatsür aser osangbener ka alisang, arishi küm 60 tain Turnbull-i metetdaktsü.

Ano külen, par linük indang yimsüsütsü tashi abentsüren melenshiba maparen nem tetsükdakba kecha majurudaktsüi kasaji sadema inyakdaktsütsü tenangzükba ka Abbott-ia metetdaktsüogo.

“Ni Turnbull indang jenjang tamajungba kümdaktsütsü memerangtsü. Ni taoba mapanga shinga anema inyaka mali aser yamaji dang teti alitsü,” ta pai ashi.

2013 küm September ita nungi tenzüka Australia Ato Kilonser menden abensang, Abbott lenisüba kübok par linük rongsenren jenjang mejungi akümba den külemi, sensotsü amshitsürena ajema kümtsüba ajanga par yimtenren teloki pa mesapui küma yashi pa melena Turnbull par lenisang kümdaktsütsü shim.

Australia nung yimsüsütsü tashi benoka aliba Liberal Party yimtenren teloki par lenisang melenshiba ajanga sangküm 2016 küm agitsü ayongba election nung opposition Labor Party telok madak takok angutsü ta nüburtemia teimla tulu yua lir.