Twenty-XI semi-final-i iogo

Kohima, Luroi/August 27 (TYO): Tawa tembangba Kohima Football league-2 nung shilem ka ama Kohima Town Club cup tanü nungi asaya tenzükogo aser tanü asaya koka Twenty XI, Viswema pur semifinal-i iogo.
KFL-2 nung jenjang pezübuba nung tembangba telok Twenty-XI puri tanabuba jenjang nung tembangba telok Ziekezou Sporting Club pur tie-breaker ajanga 5-4 agi kokogo. Iba asaya telok anapronglai goal asemsem agütsür tembangba sülen tie-breaker asayaa liasü.
Asaya nung mezüngbuba goal Twenty-XI nungi asayar Kelesal Pucho-i minute 25buba nung idaktsü, saka minute 30buba nung Ziekezou nungi asayar Keviphretuo Kire iba goal ya küptok. Iba sülen minute 37buba nung Twenty-XI purisa Zevito Khizho ajanga tanabuba goal idakja parnok tejakdang sür asaya mezüngbuba shilem tembang.
Lemon break sülen maneni Ziekezou nungi asayar Keneinguzei Pienyü-i minute 56buba nung par telok asoshi goal ka idakja goal tanaben kasasa aküm aser atakzüker aliba mapang goal 2-2 nung tembang.
Mapa apuloktsür asayaba mezüngbuba shilem nung Zevito Khizho-i maneni par telok asoshi minute 101buba nung goal ka idakja parnok tejakdang aküm saka mapang tatsüka dang lir minute 104buba nung Keneinguzei Pienyü-i iba goal küptok. Iba sülen telok kati danga goal magütsüteti asaya goal 3-3 nung tembang.
Tie-breaker asaya nung Twenty-XI puri goal pongu prongla idaktsü saka Ziekezou puri goal ka magütsüteti iba asayamung nungi tuguogo.
Asaya nung Twenty XI FC nungi asayar Keleseto Kenna-o aser Ziekiezou SC nungi asayar Vilhoubeituo Yhome na nem yellow card kaka agütsü.
Semifinal asaya nung Twenty-XI FC pur KFL-2 koker aliba telok Sechü-Zubza FC den Luroi/Aug 29 nü asayatsü.
KTC cup mezüngbuba asaya nung Kohima Deputy Commissioner Rajesh Soundararajan tetushi tesemdanger ama arua aden.
Luroi/August 28 nü asaya yamai alitsü:
1. United 16 FC Vs New Market FC @12:00 pm
2. Vanguard FC Tseminyu Vs Khriekesa FC Meriema @2:00 pm.