Twitter amshirtemi US Vice President aitsü

July 8, 2017 (Agencies): US Vice President Mike Pence-i NASA space flight equipment ka nung tetangshi ta zülur aliba mangai tangshiba noksa social media balala nung prokshiba sülen Twitter amshirtemi pa kanga mejungi aitsüogo. Pence-i Brehostibarnü Florida nung Kennedy Space Centre semdangba mapang tang teyangludak space craft, Orion nung sentsü temerem agi “critical space flight hardware” tetangshi ta zülur aliba mangai pai teka agi kongshia liasü, ta Honibarnü osang ka ajanga metetdaktsü.
Iba noksa Hokolbarnü social media balala nung prokshiba sülen nüburtemi pence menütsüa liasü.
Nüburtem rong nung karibo kanga akümtsübua parnok tebilemba lemsatep saka karibo pa indang indanga aitsüa liasü. “Asen Vice President ya third grader kati field trip mapang benshiba yimya bena lir,” ta Twitter amshir kati zülutsü. “Trump den ita trok buba külemi inyakba sülen Mike pence-i tesüngjem aser tesunep aginüa anünglaki atutsü asoshi capsule ya ajem ajema kanga nükshi aginür,” ta ano Twitter amshi kati zülutsü. Twitter amshi karibo President Donald Trump-i Saudi Arabia nung ‘glowing orb’ ka nung teka ayuba noksa den iba noksa medemdanga inoktsü, ta osang ajanga metetdaktsü.
Aji süaka Vice President-i Twitter ajanga NASA dang tatok meshiogo aser iba den külem pai asaya menüa Florida Senator Marco Rubio-i pa dang pai medangshitettsü ta shia pa jazükba ajanga tangshi ta ashi. NASA-i iba space craft nung pai tangshiba atema kecha masü ta jangjatsüogo. “Tetangshita zülutsür alibaji ‘Orion spacecraft’ nung ‘titanium Forward Bay Cover’ ka keta aliba densema anogoshia idakji medangshitsü asoshi reminder ka ama zülua ayuba lir,” ta agency ajanga metetdaktsü.
“Spacecraft nung tiles-ji bond masü tsüngda hardware ji merektettsü nüngdaker anungji temalen tangshiba atemabo kecha masü. Ajita mesera hardware ji anasa yua aliba ‘thermal heat shield’ amala yagi nembanga yur lila,” ta parnokisa shisem. Pence-i NASA nung inyakertem parnok-i US ‘space frontier’ nung tejak sür anitsü asoshi bendanga agüja inyakba atema tenüng asang.