Twitter dang nungi China nunger indang Sina Weibo amshir timba

Beijing, May 17 (Agencies): Twitter amshir dang nungi China nunger indang ‘micro-blogging’ sapang, Sina Weibo amshir timba lir.
Iba company indang mezüng quarter osang sangdongba agi, taoba küm amshir dang shilem 30 agi timba küma Sina Weibo ya ita ka nung nisung million 340-i amshir.
Anogo shia iba site ya nisung million 154-i amshir aser parnok rongnungi shilem 91-i mobile ajanga amshir.
Sina Weibo den medemdangra Twitter ya China nung mamshidaktsür aser iba sabang ya ita ka nung nisung million 328-i amshir.
“China nung social media tajungtiba amshidaktsütsü inyakba ya Weibo ajanga sayur,” ta Weibo chief executive, Gaofei Wang-i sangdong ka nung ashi.
China nung web amshir nisung million 731 lir aser parnok shilem 90 dak tali-i internet ya smartphone ajanga amshiteter, ta China Internet Network Information Centre-i ashir.
China nung Micro-blogging service nüngtugutibaji Sina Weibo ya lir aser China nung tongtibang osangkaket aser TV station temia iba sabang ya amshir.
Taoba küm Sina Weibo ajanga ‘live streaming app’, Yizhibo/Yi saya.
Weibo indang shilem 31.4 bo e-commerce Alibaba meyong lir, parnoki ‘Weibo Payment’ tenzükba ajanga iba service ya amshia online nung shishilembatsü maongka agütsü.
Iba kasa sabang tenzüktsü asoshi WeChat ajanga maparen balala inyakba mapang ka nung Weibo ajanga Yizhibo/Yi ya tenzük.
Facebook, Google, YouTube den külemi Twitter ya China nung nokdanga lir.
Ita shia Twitter amshir ya shilem 6 agi timba akümer saka ‘advertisement’ nungi sen aazükba ya shilem 8 agi tajemba lir, ta April ita sangdong.