Twitter-i ISIS dak sentakba account 125,000 shibangtsüogo

Washington, February 06 (Agencies): Twitter Inc-i 2015 küm tom nungi tang tashi nung kiralongrar den sentaktepba twitter account 125,000 tashi shibangtsüogo, ta company-i parnok blog post ajanga Hokolbarnü lemsatepogo.
Twitter-i, “Tang onoki shibangtsüba account temji tangari report asübatem lir, ajisüaka onoki iba ama mapa tamajung ladangtsü asoshi tentet ulushiogo aser ibaji ajanga melamela mapa takok angutsü,” ta metetdaktsü.
Yimsüsürtemi social media ajanga kiralongra mapa inyakba ajak osang agüjang ta tetuyuba agütsüba ama Facebook dena Tech company tulutemi parnok meyong social media ajanga tim masüba mapa inyakertem nokdangtsü mapa tenzükba sülen Twitter-ia iba osang metetdaktsü.
Twitter-i metetdaktsüba osang ya kanga tuteta meteta aküm kechiba süra tangari parnok aijaka parnoki ISIS anema inyakba kodanga memetetdaktsüi aru.
Islamic State yagi Iraq aser Syria amokbanga yimsü asür aser parnoki account million 300 tashi lapoker kiralongra osang belenshia olulutem prokba den ano züngsem tasena anioker.
George Washington University nung kiralongra tebilemtsü nung deputy director Seamus Hughes-i, “Hokolbar nü twitter-i sangdongba osang nung kiralongrar account aika shibangtsüba metetdaktsüogo. Parnoki kiralongra inyakyimtem tapu aisü küma lemdanger asadanga inyaker. Item nisung aikati kanga sashia mereprangba website tem ajanga parnok mapa inyaktsü tenzükogo,” ta metetdaktsü.
January ita nung national security ketdangsertemi Twitter, Facebook Inc, Apple Inc, aser Google parent Alphabet Inc nungi lenirtem jaoka senden ka mena liasü ajisüaka twitter den company aika nungi parnok chief executive officer tem arua maden.
Twitter-i tang metetdaktsüba osangji kanga junger aser iba osang ajanga parnoki tajung inyaktetba tali jangja sayur, ta Intelligence Committee nung züngsem Adam Schiff-i ashidang, pai, ano tarutsü nunga iba ama mapa tali tashi ita inyaktsüla, ta shisem.