Twitter nung India nunger oshi pezü enoksemogo

New Delhi, July 31 (Agencies): Twitter nung India nunger oshi pezü – Gujarati, Kannada, Marathi aser Tamil enoksemogo, ta twitter ajanga metetdaktsüogo. Tang tasen enokba oshitem ya sentepa twitter nung India nunger oshi trok jungogo.
Hindi aser Bengali oshitem twitter nung enoker joko küm ka jungogo, ta social media company-i blog post ka ajanga ashi.
Twitter-i ashiba agi, item oshi pezü ya twitter nung oshi meyipzükertemi ‘translation centre’ ajanga tera meyiper enoktsü.
“Parnoki meyari asübo onok kijaibo kecha mesütetla. Twitter nung item oshi enokba ajanga India nung nübur ajaki tang tatalokdak osang agiteptettsü aser lokti sensaksem mela mela agitettsü,” ta twitter-isa ashi.
Twitter India communications nung tekolakba, Rohan Vyavaharkar-i, “Twitter amshirtem kanga jangratema tajungba amshidaktsütsü onok nükjidong lir aser ibaji ajanga nübur aikati amshitsü aser tajangzük angutsü,” ta ashi.
Tamshirtemi pei amshinüba oshiji ‘Settings’ nungi melena amshitettsü.
“Android app amshirtemi pei phone nung aliba settings nung item oshi pezü rongnung koba amshiner aji shima amshitettsü,” ta twitter ajangasa ashi.
eMarkerter ajanga ashiba agi, India nung Twitter amshir nisung million 22.2 tashi kümogo.