TYO-i Kohima Mini Zoo nung ozütem chiok

Retired bureaucrat K K Sema, Proprietor of Mini Zoo Kohima, Rüvuotuo Belho and officials of TYO releasing birds at the Zoo site at Gasie, Kohima on June 7, 2017.

Kohima, June 7 (TYO): Tsütuonuomia Youth Organisation (TYO), Kohima Village den taoba sorkar ketdsangser K K Sema aser Mini Zoo Kohima kibur, Rüvuotuo Belho nungertemi Bodbarnü ozü 30 chiokogo.
Kümshia TYO-i “In act of love for our beautiful animals” omen nung ajemdaker Gasie nung aliba Mini Zoo nung ozütem chioker.
Mini Zoo ya Rüvuotuo-i 2004 küm lapok aser iba zoo nung ozü aser shirurur tapu 36 lir.
Mini Zoo ya Honibar aser Deobar anogotem, anepdang nungi nikongdang tashi public atema lapoker. Zoo reprangnür nisung shiai sen 20 agütsür reprangtsü akok saka arishi küm 10 tashi tanurtem dangbo sen magir.
Mini Zoo kiburi ozü aser shirurutem anepaluba dang masü saka wazüka ayuba atema tanü KK Sema-i tenüngsang agütsü.
Naga nungeri ozü mesüra shiruru shi ajak achir saka asenoki alima nung tsüngsang-mopung melenshiba khuret angateta, asen arem-min aser shirurutem wazüka ayutsüla, ta paisa ayongzük.
KK Sema-isa Forest Department aser State sorkar dang Nagaland state nung ozü aser shiruru anepalur aser wazüka ayutsü merangertem nem teyari agütsütsüla, ta mepishia metetdaktsü.