Tzü aser mopong temerük

Alima nung tzü aser mopong medeni taküm alitsü makok saka angati angur. Ibaji tesüngmangtsüka aser tepelatsüka lir. Ajisüaka, ano külen tejashitsü kaji asenoki asenok taküm alitsü tenüngdaktiba ana tzü aser mopong na menentsütsü mapur. Atangji, chiyongtsü medeni asenok taküm melitet, ajisüaka chiyongtsü atemabo asenoki kanga meranga inyaker aser jenjang tasak agi alia chiyonger. Iba amaji tzü aser mopong yaa meranga inyaker anguba oset ka asünungbo jenjang kanga tasak süla. Ajisüaka, asenok taküm alitsü asoshi kanga tenüngdaktiba ana tzü aser mopong ya Tsüngremi angati talubosa agitsü Tsüngremi moatsü ser nung asenok kecha mebilemdangi menendaktsüogo. Iba jagi tanü asenok kangshir. Aji oda, alima tatsükba-tatsükba küma alima nung tzü tajemtsü agi tanüngba-tanüngba küma aoba ya asenoki asenoksasa asenok timatemtsü aser lendongi aitsü atongba mapa ka lir. Atangji, asenoki tzü mopong merüka alitsü asoshi süngdonglidong mesamadaktsüi arema wazüka ayutsüba indangbo angatetogo, anungji asenoki süngdong atemer aser arem wazüka ayur. Ajisüaka, nisungtem nütsüng renloker aser yimti tasen tasen küma aodang tesem aika arem agi moapu akümer aser ano süngdong temaka nisunger nüngdakji teimba teimba akümer asünungji süngdong atemba dang nungibo teimba lensüka adoker. Atangji, alima tzü mopong menenba kuliji aji dangbo masü saka industry tapu tapu lapoka mapa inyakba nungi mokozü aser mopong tatsük adoker aser mozü tzü tapu balala ali telongi ludaktsür aser ayong nunga yimokba agi tzü mopong menendaktsür. Iba dang nungi tali ano asenok ajaki tzü mopong menentsüsa inyakba mapa kaji gari senzüba ajanga adoker. Aji oda, alima tasüng gari masem senzüba shia nungi mopong tatsük aser mokozü adokba agi alima aser anüng nung dena tzü mopong menendaktsüba jenjangji kanga tulu lir. Ibayongji, tangar tashitemeteter aser takar lima nungbo gari tejenbo mamshidaktsür aser gari akayonga bus nung dang külemi senzüdaktsür. Iba tia denji medemdanga asen lima nung gari amshiba yimya ya reprangdangra asenokbo gari jetsaa mao tashi aser gari nungi mokozü adokba agi tenük agi kecha mangu akümyonga odang tenokdangba kecha melii senzür. Iba ama gari nung mokozü adokdakja horn ola tashi agi agüja senzübaji dang asenok asoshibo konang amai bilemer. Ibaji dang masü saka tetsüng agi minute ter nung atongtsüba tesem tashi aotsü asoshi gari bener aor. Ibajiang asenok asoshi konang ka amato kümogo. Aji oda, joko makayonga bus nung amentsübo asenok aikati maksü amai bilemer. Iba ama tangatetba tila aser temesü aliba agi asenoki senotsüa mekümzüktetter aser tzü moponga melamelaa menendaktsür. Ano, asenoki meteta mesüra memeteti tzü mopong menentsüsa inyakba mapa kaji ayong nung janaona tokoktsür. Asenoki ayong yabo janaona bendena ponger aotsü asoshi ayimer amai bilemer. Ajisüaka, ayong ajanga dang moponga merükdaktsür aser alima topur jungdaktsür. Ibaji dang masü saka Tsüngremi asenok atema ayong nung chiyongtsü aika rezüngja lir. Ibaji memeteti asenoki yimti aokba jana dena bener oagi ayong nung nangoka yutsübaji matong aser mangatet inyakba mapa tuluka asütsü. Iba denji külemi ano tanübo asen lima nunga tesem aika nung mijang atur aser mijang aturtemi ali telong agi tema küma yutsür aor. Iba li nungji kecha memeyitsü. Iba jagi tanga lima nungbo mijang aturtemi mijang tuzüker parnoki atuba ongkentemji ali tasen tua bener arua jungjunga nembanga toktsür aser iba madakji akhi ama sünglidong meidaktsür. Itemji yimten aser lokti tebang iagi inyaker. Iba amaji tzü mopong memenendaktsüi asenoki asenoksasa inyaktettsüba mapa kabosa asenoki inyaktsüla. Tzü aser mopong yabo tesem ka nung dang malir asünungji asen lima nung tzü mopong menenba agi tangar lima dena menentsür aser ano asen lima nung asenoki tzü mopong merüktsüsa inyakba mapa agia tangar lima dena merüktettsür. Ibayongji, alima nung tz mopong merüka ayutsü atema Yimyim ka lir, ibaji ” Alima ajak ajungtsü ta bilema na alidak inyakang.” Atangji, iba tangatetba nung Kohima nung Angami lanurtemi tawa anogo ka gari mesenzüdaktsü aser factory kecha nunga mapa meinyakdaktsüi mongogo. Atangji, iba jagi senotsü aika akoksar alitsü. Ajisüaka, aji tenük agi anguba takoksa dang asütsü saka iba ama anogo amongba jagi tenük agi manguba tajangzük tuluka nguogo ta bilemdi.