Tzü ayokba dokan !

Nagaland nung yibo mayoker saka tzü tajemtsü talubosa ayoker aser tzü ayokba dokan aika nung tzü dang nungibo yi teimba angur. Nagaland topur ajung raksabaji aji ka asütsü. Asenoki ajaki metet, Nagaland nung yi yanglutsü aser ayoktsü ozüng agi memelar. Iba jagi bendanglen nungi Nagaland süngküm (gate) ajanga yi bener aittsü memelar, anungji Nagaland nung yi yanglutsü aser ayoktsü melatsübajibo otsü maka. Iba ozüngji mapa küma inyaktsü asoshi Excise department purtemi meranga inyaker aser lokti tentettemia mapang mapang shia yi mita oa apur. Ano, arogotemia yi mayoktsü aser majemtsü asoshi kanga sashia nokdanger. Atangji, yamaji nokdangaka anogo shia Nagaland yimtitem nungi gari tulu nung yi botol tazüng sünga-sünga oshir tzümaleni bener aluba angur. Item botol tazüngtemji Nagaland nung yanglur yoker masü saka bendanglen nungi Nagaland süngküm ajanga yi sünga-sünga enoker yokba botoltem lir. Itemji tangari masü asenok Naga nungertemi ajemba yi botoltem lir. Tetezü, yi nokdangaka menokdangtet Nagaland süngküm adena anogo shia yi bener idaktsür. Ibayongji, asenok rongnunga nisung aikati Nagaland nung yi mayoktsü ozüng azüngba mapa ya tamakok mapa ka lir, anungji yi mayoktsü ozüng zünga aliba ya agientsüla ta jembir. Ashiko, arogoi ka yi anema menokdak asünungbo, lokti tentet aser yimten tashi kija agibo tang tashi yi mayoktsü ozüng magienibo melila. Ano, asenoki ngua atalokba kaji, asen lima nung asenoki yi mitba aser apuba dang nungibo Assam Rifles sepaitemiang teimba apuba mapang mapang shia angur. Ibaji bilemdangdang, yi nokdangba mapa nung Excise department, arogo aser lokti tentettemi jembiba ama temulung kangabo magütsür südi ta angatetter. Atangji, arogo karibo yi ayokertem ki tonga oagi yi melena tanga shishilembaba mapa tajung kar tenzüktsü asoshi senotsü teyari agütsüba osanga angashiogo. Yi meyokdaktsütsüba tongpang nung hadir tajungtibaji aji asütsü. Ano, lokti tentettem, talisa tetsürtemi mapang mapang shia yi mita inyakba agia yi nokdangba nung mapa tuluka inyakdagi. Atangji, yi meyokdaktsütsü merangba mapaji yi mejemdaktsütsü merangba mapa lir. Ano, item mapatem dakji alaka excise department, arogo aser lokti tentettemi yi jemertem yi ajemba tia nungi kümzüktsü asoshi sentong tapu balala yanglua inyaktsübaji kanga tongtibang asütsü. Ochi o kaji, yi nokdanga aliba ya agientsüla ta jembirtemia yi ajemba ya junger tabo mashir aser mashitsü südi. Iba ama mejemnüba chiyongtsü ka asenok chirnurtem nembo talubosa jemdaktsütsü asoshi yanglua ayoktsü melatsübaji asenok shisatsü aser temulungjangibo magizüker. Atangji, alima asünungji kechi majung aji inyakner aser chiajemnür. Ibayongji ozüng raksar adoker. Aji oda, nokdangaka makokerji ta ser drugs talubo yokdaktsütsü asü ? Nokdangyonga mangarji ta ser nüktapangtatsü melatsü asü ? Auyatsü melatsü asü ? Itemji kodang bilemdangdir, alima nung ali tashi ozüng raksar alitsü. Ajisüaka, ozüng raksar onsara akümerji ta ser ozüng agientsüba masü saka ozüngang akangshia mapa küma inyaktsü nüngdak akümer. Tanübo asen town nung aser asen kiyong nung tajemtsü tzü ayoker asü, yi ayokar mebendangtet dokan lapoka angur. Atangji, itemji asenok taküm aser mulungjang mesüker. Tema tangutsübo tajung saka telong nung tebilembabo majung. Alima nung alirji koba lima nung südirsüaka, alima nung yi yanglu tashi, yiji kenyongi mali aser majem küma nokdangtsübo makoktsü, ajisüaka asenok tenük agi ngua yi ayoktsü asoshi tzü dokan lapokba yabosa reprangtsüla. Item dokan kiburtem nema excise aser arogo nungertemi teyari agüja shitakba tzü tajemtsü ayoktsü ajungshitsüla ta bilemer. Asenokbo akok tashi asen lima ya anemsü lima ka mekümdaktsüli aser akok tashi tamajung anema raraba nung meranga nokdaker kaka akümtsü merangtepdi.