Tzü-mopung melenshiba ya asangsang lir: K. Therie

Dimapur, Mongputeni/Oct. 22 (TYO): Tzü-mopung melenshiba ajanga meimchir arishi küm aser rongsenketzüng nung kanga mejungi kongshitsü. 2021 küm meyi tzünglu kanga ajema aruba asenoki nguogo. Aluyimer aikati alu junga meyimtet aser tekong lu ayimer aser horticulture nunga züsentetba ajema liasü, ta NPCC tir, K. Therie-i sangdong ka ajanga ashi.

Temperature tatsükba akumba, tzüngsa-rusa tali akumba aser mesen/shiruru tila poktetba asenok nük agi ngugo. Dimapur nung tesüiba mapang air conditioner amshiba ya September ita tiyongtsü nungbo anena liasü, saka 2021 küm October tatemlena AC maneni amshir, ta pai ashi.

Four lane highway aser railway lenmang yangludang arem jidokba ajanga meyi mapang tatsük tali kumdaktsü. Terenlok maparen inyakdang süngdong-lidong samadaktsüba tanaben ngutettsü atema sorkari sentong yanglutsüla, ta ashi.

Ali telung nung aliba tzüa ajema kumogo. Nütsüng yongsük shilem 70 dak tema ali telung nungi adokba tzü nung metaloka alir, kechiaser sorkari tzü agütsüba nung kanga mejungi tamakok ajurua lir. Nüburtem ajemtsü atema sorkari tzü tajung agütsütsüla. Nüburtem tajemtsü tzü aliba nung sen aika indoker, ta NPCC tiri ashi.

Akhi mapang ama masü nüburtemi civil supply tem nung metaloka alitsü tenzükogo. Ajisüaka alimar yimya agi lendong-tsüding bener aruba nungi jenbua alitsü atema sorkari renemshia aliba mangur. Tzünglu sashia aruba, tzümetsüng aser tzüngsarusa mapang nüngdakba peritsütsü atema sorkar renema alitsüla, kechiaser alima tesem ajungalen tzü-mopung takzütsü tasak kumogo.

Anüngdang truck senzüba anendakja ataba ajanga nüburtem rongsenketzüng kanga akoksar. Osettsüset abenba ghonda 12 anendaktsüba ya aibelen lir. Sorkari truck tem anüngdang manendaktsüi jajadaktsütsüla. Sorkari tajangzük atema kisüng mebilemi lenmang tajungba kumdaktsütsü bilemtsüla, ta Therie-i ashi.

Sorkari nüburtem nem arok-apa maliba, molushi maliba mesüra aoyi maliba lenmang agütsütsü/yanglutsütsü bilemtsüla. Nüburtemi shimteter temi nüburtem reshikangshir.

Maneni sorkari nüburtem temang nung timtem agütsüba nungi kumzüka yimya tajung amshitsü sentongtem yanglutsüla.

Yimdak yimtsüngtem nung health services nung temolung agütsütsü mapang tongja tongogo. Yimdak yimtsüngtem nung health services tenüng nung teyari agütsütsü atema dena senotsü jenti lalur. Ajisüaka yimdak yimtsüngtem nung nisungtem junga anepalu mesüi südaktsür. Kari mozüki tongteter saka tasü bener aru ta sangdonger. Aika yamaji asür, kechiaser parnok menur bener arur.

Sorkar nung tashi temeteter, lokti nung tanishir aser elected member tem lir. Ajisüaka tesasatsüka Nagaland nung tashi temeteter temi pei agitsü dang bilema rongsen tali ang arishir.

Election ajanga shimtetba lenirtemi sen aser tashu amshia election timba nung takok angutsü kisüng atema dang bilemra, tashi temeteter temi asen putu wazüka ayutsü meranga tangatetba tajung nung khuret abentsüla, ta Therie-isa ashi.