Tzü shiruru tulu 333 tepseta bener shilanger

Tokyo, Metsüremi 31 (Agencies) : Pei tetsü mamatsü ayongba tzü shiruru tulu (whale) apui aoba Japan nunger rong ka tanü Küptoknü tzüyimküm tonga meyipa aruogo. Antarctic Ocean nungi parnoki iba tzü shiruruji 333 pua bener shilang; iba tzü shiruru metepsetdaktsüi kümzüka ayutsü nokdakertemi timtem kecha magütsü, ta ketdangsertemi osang ka metetdaktsüogo.
Taoba November ita nung iba tzü shiruru apur telok pongu tzüyim anüolentip tsütsüi apusoa ao.
Parnok indang jahaz tuluba tenüng agi Nisshin Maru densema rong asembo tanep Japan anüolen tsütsü Shimonoseki tzüküm tonga aruogo, ta port official kati metetdaktsü.
Nükjidong yanglur apusoba ama ‘anti-whaling campaigner’-temi timtem kecha magütsüi dang parnoki iba tzü shiruruji 333 (minke whales) apu, ta Fisheries Agency ajanga metetdaktsü.
Taoba mapangtem nungbo Japan nunger ‘whalers’ o shiruru temeten atema nokdakertem talisa ‘Sea Shepherd activist group’ den tzüyim nung raratepa liasü.
‘International Whaling Commission moratorium on hunting’ nung Japan nungera densema lir saka ‘scientific research’ atema iba tzü shiruru tepsetbajibo parnoki melar.
Iba tzü shiruru yimyayimpong aser kechisarena indang bushitsü atema iba shiruru tepsettsüji nüngdaker ta Tokyo-i ashir aji oda süaka, tepsetba sülen aiben iba ya chiyungba langbang nung amshia achiba kuli lir.