Tzü tajemtsü anguba tesemtem wazüka ayutsüla : Er Yanger Pongen

Sungratsu (Mokokchung), March 20 (TYO) : March 20, 2016 nü Senden Salang, Sungratsu nung “Water Conservation and Sanitation” shisatokden ka alidang arem-min aser talisa tzü apokdak wazüka ayutsü atema ayongzük.
Iba sentong nung shisalen agütsürji PHED Mokokchung executive engineer, Er Yanger Pongen liasü aser pai Sungratsu nunger lushi nung aliba Angetyongpang ayong indang tongti süa jembi.
Angetyongpang ayong nungi Mokokchung jila den yimtsüng aika dangi tzü belener. Mezüngbo Angetyongpang ayong nungi anogo nung tzü litre lakh 4 den timba nguya liasü, saka tangbo anogo nung litre meyirjang 40 den tajemba angur, ta Er Yanger Pongen-i ashi.
Arem tia mejungi akümba aser nisungtemi iba tesem nung lipoküm raksaja mapa inyakba ajanga iba khuret ajurur, ta paisa shisem.
Mokokchung district kübok yimtsüng kar department atema kanga dang tongtipang tesem liasü aser item yimtsüng nungi tanga yimtsüngtem dangi tzü aben, saka tangbo asenoki maangba ajanga tzü peria mongui tim atemer, ta paisa metetdaktsü.
Iba khuret asoshi sorkari mapa inyaktsü matai, pei pei lushi nung aliba tzü apokdak tesemtem wazüka ayutsü asoshi mapa inyaktsüla. Asenok tangatetba melenshitsüla aser ibaji ajanga tejakleni aoba yimtsüng ka akümtsü, ta
Iba sentong ya PHED, Mokokchung Division aser Sungratsu Students’ Union-i National Rural Drinking Water and Sanitation Awareness campaign kübok ayongzüka agi.