Tzüdikong nung kitsük-kirong lendong atalok

Dimapur, Chiteni/July 03 (TYO): Chiteni/July 01, 2018 anogo Tzüdikong Town kübok A.Y Valley nung kibong asem telidak ki tulu ka nung mi adoka rongtokogo. Iba kitsük-kirong lendong nung ki oset sen lakh aika jenjang rongtokba den nisung ka tera yiruba dak alaka nisung asüamabo meliasü. Tenük kuli alir nisung kari ashiba agi, iba mi lendong ya electric short circuit ajanga adok. Iba ki ya nikongdang 2:30 ako shi nung mi adoka arong tenzükdang nisung kabo amoa orr liasü, saka kinungeri anizuk. Iba ki kima garitem liasü, saka tia kaa item gariji bener oteta kümzük. Nisung noklang aika adenshia mi inseptsü merangaka mekoki alidang jila nung aliba Fire Station pur mapang shidak nung arua mi inseptsüba agi temeket kitem ronga moi kümzük.
Iba ki arongba osang angshia Tuli ADC, I. Meren-i anir SDO (Civil), SDPO aser ketdangsür teyariteper jenti arua nija aser sorkar tsütsü nungi teyari agütsüba atema pelar, ta kirongba lendong nung adener temi ashi. Talisa iba ama mi lendong ajirudang Tzüdikong/Tuli Fire Station nungi mapang shidak nung teyari agitsüba asoshi pelar, ta parnokisa shisem.