Tzudikong nung Nagaland-Assam arrtsü senden amen

Dimapur, April 21 (TYO): Tuli Area Joint Council Forum (TAJCF)-i acha-ayanga April 20, 2017 nü Tzudikong nung United Naga Tribes Association on Border Areas (UNTABA)-i lokti senden ka amen.
Iba sentong nung Irrigation & Flood Control Parliamentary Secretary, N. Jacob Zhimomi-i Nagaland sorkar tenüng nung aden aser pai arrtsü onük atema sorkar tebilembatem metetdaktsü.
Jacob Zhimomi-isa UNTABA-i mapa inyakba atema tenüngsang agütsü, ta UNTABA sangdong ka nung metetdaktsü.
Iba senden nung Ex Minister, K. Tiameren Aier, Ex MLA L. Temjen Jamir, Ex MLA Shami Angh, Border Peace Coordination Committee Sector A,B,C President Kughalu Aye, W.Y Kithan aser H. Chingjei Konyak nungertem aden.
Senden nung telemtetba kar agi aser itemji, Assam aser Nagaland tsüngda arrtsü ken o ya Political Settlement mapang bentettsü aser 1972 o 1979 Interim agreement aser iba dak sendakba tenangzükbatem mesüra MoU tem ajak meyipa reprangshimtsü dena lir.
Naga nunger putiotsü, alemli nungi aliba arrtsü aser temetentem nung ajemdaker Disputed Area Belt (DAB) agientsü, arrtsü tesemtem nung Nagaland sorkari Nagaland Armed Police (NAP) mapa lemzüktsütsü aser arrtsü anasa aliba Naga yimtsüng ajak nung polling station tem lapoktsü senden nung adenertemi bangzünga renem, ta UNTABA sangdong nungsa metetdaktsü.
Iba senden nung arrtsü anasa aliba district tem- Peren, Dimapur, Wokha, Longleng, Mokokchung aser Mon nungi teshimtet nübotem aden.