Tzüdikong Town nung Nutrition Day mongogo

Nurse aser asha ajanga tila tanurtem ajem tutsüba aser mozü jemdaktsüba sülen Watsü I. Ayala Jamir ajanga tesayuba agütsüba noksa nung angur.

Dimapur, Sept. 17 (TYO) : Tzüdikong Town women health committee ajanga 03-08-2015 aser 02-09-2015 nung Nutrition Day nüngtem nung Tzüdikong town Sub-centre nung nurse aser ASHA den WHC member ajak külemi longjemer iba sentong agia liasü. Item anogotem nung tanur tila mama yungertem nüm Ajem agüja aser mozü jemdakja liasü. Ano iba den külemi tanur tetsütemi tanur tila asüdang koma anepalutsü iba tesayuba tajung Watsü I. Ayala Jamir WHC president-i lemsatepa liasü, ta sangdong ka ajanga metetdaktsüogo.
Iba den 08-09-2015 anogo nung yimti nung temtemer yaritsü asoshi rongsen lenmang bushia lenmang nung Gari-tem shitokja among. Adhoc-Town committee chairman Shri.O.Benjung Jamir-i anir committee ajaki onok den yariteba liasü iba asoshi parnok danga pelaba lemsateper, ano shirnokisa tenla tajung agütsüogo nenok ajak dang pelaba metetdaktsür, ta P. Sosang Jamir, Chairman, Sub-centre, Tzüdikong Town ajanga kasa sangdong ajangasa metetdaktsüogo.