Tzüdikong town SBI ayatai

~ I. Meren Lemtur, Tzüdikong Town.

Tanü asenok aliba putu ya inyakyim ajak nung kanga dang karaa renloka aoba tensa nung asenok lidagi. Mapang nung mapa masemba putu ka lir. Akhi mapang tu kodang bilemdangdir office nung mapa kar inyakytsü aonung ita junga mesüra hopta junga nungang mapatem tema inyaktet, saka tanü putu nung bo alima temetetba nung kanga renloka mapa ajak Computer aser machine balala amshia mapanga yamaji tatsütiba nung mapatem ajak tema inyakteper, iba amaji nüburtema anisüngzük angur.
Saka Tzüdikong Town nung SBI koba akhidang nungi lapoka aruba tanü tashi lir, iba SBI ya tasüa masü taküma masü ta nüburtem timtem tulu ajuruba mapang ka agi tonger lir. Tang ajungben bendang balala nung School tanurtem aser nüngdak balala asoshi sen yoktsü adok nung LINK majung ta sür anogo aika mapa meinyaki Bank kima nung LINK FAILURE ta notice yutsür. Bank nung inyakertem bankbo lapoka lir, saka mapabo kecha meinyaki kazüteper. Ano khen khen Link junga alidang Light mali ta mapa meinyaker. Generator ka alibajia teti dang raksar,saka yamaji light mali timtimaka kiburi iba raksaba asoshi kecha hau ta mali odang toktsür. Office nung inyakertemi tim tayutsü mayu teti yamai timtem agütsüaka nisung shingaia ya kechiba (?) ta ola adokba mali odang arema kazür.
Iba den ano mapa inyaker staff peria meyutetba ajanga minute ishika nung atemtsü mapa tu ghonda asem pezü tashi mapa teinyaktsü jenti yur anogo mapang ajak omaa Bank telong nung tasümang nükteper ama mokteba ataa kazüteper. Oda ajak dak alaka yimdak yimtsüng balala nungi Bank nung mapa inyaktsü aser tanurtem nem senotsü yoktsü mapa bener rongsen nübo indoka gari hire sür aru nung mapa kecha meinyaki anogo tepiyong monga kazür meyiba oadoker. Oda asüng Bank-i aotsü mapa yur aonung mejang dang “aya asünga Bank nung anogo mapang ajak omaa amongtsüa na,” ta shisabulua mejanger.
Ano account passbook update asütsü agütsüra zübazüba dang machine majung ta ita anogo aika passbook update mesütsür, pocket nung pass book update asütsü semer senzü dang pocketbo ajak shisa aor. Ni Tzüdikong town ta dang amshiaka, iba Town nungsa Tuli paper mill amenoka lir, anungji iba SBI yaa tangar lima nung koda nübortem mapang shidak shidak nung mapatema inyaktsür, yamaji iba town ya-a kanga tongtipang ka asünung asen SBI jia shipanga meyura lapokti süra staff aser nüngdakba osettemjia shidak yua mapatem inyaktsü asoshi town nung yimsüsür aser nübor ajaki ken temulung agüja reprangshitsü mapang tongja tongogo, asen nüburtem nai ni ya metetdi , asenoki tashi maitba asoshi kibok aser lokti balala nung nemnemabo jembir saka tashi maitba yanglushitsü asoshi tuteta ashirbo shianga mali, anungji nemnema mekazüi iba SBI asoshi ajaki shilem agitsü merangtsüla ta kü shisa yari asen limabo tangar tejakleni aodang yamai dang atasaa kazütsü no (?) ta temulung ronga bilemba asen nüpurtem dang ajungshir.