Tzümetsüng agi India, Nepal aser B’desh nung tanur mn 16 kongshiogo

New Delhi/UN, September 03 (Agencies): Asia nung linük asem- India, Bangladesh aser Nepal nung tzümetsüng ajanga tanur million 16 rongdak teyari nüngdaka lir, ta tanü UN agency osang ka ajanga metetdaktsü.
UNICEF Regional Director for South Asia, Jean Gough-i, “Item tezümetsüng ajanga tanur aika pei talidak ki aser school makai kümogo iba den külemi pei medemer aser kinüngertem samaogo. Tzünglu maneni arur aser tzümetsüngji south tsütsüleni ayimer, anungji ano lendong tuluba ataloktsüa akok,” ta metetdaktsü.
Tanur million 16 den parnok tsüraburtem taküm kümzüka alitsü atema teyari nüngdaker, ta UNICEF-i asadangteter. Taküm August ita tom nungi tenzüka tzümetsüng lendong balala nung tajemba agi nisung 1,288 tashi süogo.
Tang tanurtemi rongdak nüngdakbaji tzü tajemtsü tajung, tashidak balala nokdangtsü osettem, chiyungtsü aser tejenokdak semtu nüngdaker, ta UN agency-isa ashi.
Iba atema United Nations Children’s Fund (UNICEF)-i item linük asem sorkar aser meimchir temeten atema inyaker partners den senteper jembishinüdar.
“School kiojen jenti raksaba tetezü, tanur meyirjang aika hopta mesüra ita aika school-i moutettsü,” ta Gough-isa shisem.
India nung tzümetsüng ajanga state pezü nung nisung million 31 shi kanga mejungi kongshiogo, aser iba nungji tanur million 12.33 densema lir. Iba den külemi ki 805,183 aser school 15,455 raksaogo, aser ibaji ajanga tanur million 1 shi kongshiogo.