Tzümetsüng ajanga kibong 3000 talidak makai kümogo

Agartala, September 4 (Agencies): Tripura nung tzünglu kanga sashia aruba ajanga tzümetsüng tanaben arua kibong 3000 dak tali ki makai kümogo aser relief camp balalai belenerogo.
Osang ajanga ashiba agi, Bangladesh nung tzümetsünga aliba ajanga Haora, Kathakhal aser Kalapaniakhal ayongtem nungi tzü Bangladesh-i sadema meyimoker. Honibar aonung Baramura hill range nung tzünglu kanga sashia aruba ajanga Agartala eastern aser southern tesemtem ajak metsüngbangogo aser iba nung Agartala yimti dena tesem 15 khenyongi metsüngbangogo.
District Magistrate (West Tripura) Dr Milind Ramteke-i ashiba agi, ketdangsertemi Haora ayong nung tzünokdang (embankment) kümzüka ayutsü asoshi jenjang tapet agiogo. Iba dak alaka ano tensa asadanga meita atatsü atema ketdangsertemi tzünokdangtem tanen makai nükdar.
“Agartala nung tzü mesüdokba nung timtem adoka lir aser taküm Tripur nung tzünglu kanga sashia aruba ajangshia arudar aser Agartala nungi Bangladesh-i tzü kera kera yima malur kechiyong Bangladesh nung Haora ayong lua lungtepba tongtibangtiba ayong anogo ishika mushia yimdar,” ta Ramteke-i ashi.
Kasa mapang nung lokti balalai yimti nung tzü mesüdoktsüba atema kilentzü shidak yanglua maliba aser sentong tajung ka makai yimti nung ki o jen balala yangluyonga aoba atema ashishia arudar. Parnoki yimti nung kilentsü tangsa yanglutsü aser tzünokdang yanglushitsü asoshi akhanger.