Tzümetsüng ajanga sen crore 300 dak tali takoksa alu

Agartala, October 24 (Agencies): Taküm küm Tripura nung tzümetsüng asemben ren aruba ajanga alu, kiojen, ango tzübu aser lenmang amala raksaba ajanga sen crore 300 shi takoksa aluogo.
Tzümetsüng ajanga raksatsüba nung takoksa aluba ajak asadanger ang item ya menoktsü atema state-i sorkar Centre tang sen otsü teyari meshitsü, ta Relief Minister Badal Choudhury-i ashi.
“Onoki Agriculture, Fishery, PWD, Irrigation amala department nungi tzümetsüng ajanga teraksatsüba adokdaktsüba nung sen crore 156 takoksa aluba osang angazükogo. Ajisüaka taoba mapang nung tsümetsüng anaben ren aruba nung sen crore 144 takoksa alu.
Item ajak meyokteper tang tashi nung state sen crore 300 takoksa aluogo. Ki raksaba ajanga takoksa aluba osang ano mangazük. Item ajak osang tejangja anguba sülen onoki centre dang seotsü teyari meshitsü,” ta Choudhury-i Civil Secretariat nung Hombarnü ashi.
Chief Minister Manik Sarkar lenisüba kübok tanü Civil Secretariat nung tzümetsüng ajanga takoksa bener arutsüba dak sendakba nung lepa reprangshiba senden ka kaogo. Iba senden nung Choudhury-a densema liasü.
Paisa ashiba agi, October 19 nungi 22 nü tashi tzünglu kanga sashia aruba sülen tzümetsüng lendong nung kangshiba kibong 5893 atema tejenokdak agütsütsü asoshi sorkari state ajunga nung relief camps 139 lapokogo. Ajisüaka kibongtem aika pei ki bushia ogo aser camp tem aika shibangogo.
Tir Birajit Sinha kübok Congress pur telok kati tanü relief camp karbo semdangogo. NSUI general secretary Rakesh Das-a parnok den külemi ao.
Camp tem semdangba sülen Sinha-i, kibong 5000 dak tema kangshia doktsüba atema Left sorkar aitsüogo aser lendong balala den raratsü atema sorkari jenjang shidak agia mali, ta paisa ashi.
“Sorkari lendong balala den raratsüba atema tanü asüng tensa den apet jenjang shidak agia mali. Sorkari jenjang tapet magi tashi tzümetsüng mapang nüburtem maneni kangshitsü,” ta Sinah-i ashi.