Tzümetsüng & anentsü lendong nung nisung 21 shi süogo

Brazil anüdoklentip tsütsülen, Sao Paulo region nung tzünglu kanga sashia aruba sülen tayimtsü nungi agiba Franco da Rocha jila tzü agi metsüngbanger aliba noksa ka yangi angur.
(Sao Paulo, March 12)

Sao Paulo, March 12 (Agencies): Brazil nung tentetba yimti tulutiba, Sao Paulo aser temeket tesemtem nung tzünglu ghonda 24 shi tanen makai aruba ajanga nüburtemi timtem toushi jenti ajuruba den külemi, nüburtema nisung 21 shi asüba osang tang tashi nung jangjaogo.
Tan Brehostibar nü nungi tenzüka Hokolbar nü tashi tzünglu kanga sashia aruba ajanga bener arutsüba tzümetsüng aser anentsü lendong na nung tan nisungtemji asüba osang jangjaogo.
“Firefighter ketdangser nisung 150 dak temai tan atalokba tzümetsüng aser anentsü lendong na nung samar nisungtem bushitsü tenzükogo,” ta Sao Paulo Governor, Geraldo Alckmin-ia metetdaktsü.
Tan lendong ajurushiba tesemtem nung alirtem yaritsü asoshi dollar sen million jenti agütsütsü tenangzükba olena pai sangoktsüogo.
Tan tzümetsüng lendong atalokba ajanga nüburtemi light tesangwa mongui kanga timatemba aser Sao Paulo international airport nunga senzüsenpongertemi ghonda 6 shi anenzüka amongtsüsa akümba osang jangjaogo.
Nisung million 20 shi alidak, Sao Paulo nung küm 2 tashi tzünglu marui nüburtem kanga rokongdaktsüba sülen tan tzünglu kanga sashia arua tzümetsüng aser anentsü lendong ataloker lir.