Tzümetsüng & anentsüh atema Assam-i teyari balaka nüngdaker

Kaziranga (Assam), July 25, 2016: Assam nung aliba Kaziranga National Park telung nung tzü metsüngba sülen Hombarnü arem shiti kati Highway adena tanga tesem kati aoba noksa angur. Honibarnü Brahmaputra ayong den iba ayong nung yimokba ayongtem aika nung tzü taliba metsüngba sülen Assam aser Arunachal Pradesh na nung tzümetsüng tensa kanga tamajungba kümogo.  Assam kübok district 8 nungi tang tzümetsüng agi kongshirtem rongnung nisung lakh 5 dak tema relief camp 70 nung jenoka lir. 

Guwahati, July 25 (Agencies) : Tzümetsüng aser anentsüh khurettem anepalutsü atema Assam-i ‘special assistance’ nüngdaker, ta state sorkari tanü metetdaktsü.
“Onoki tongtipang teinyaktsütem shimtsü. Tzümetsüng aser ali anenzüka aoba khurettem atema teyari balaka aser senotsü nüngdaker. Tang tashi nungbo SDRF (State Disaster Response Force) kübok dang onok senotsü angur” ta Water Resources Minister, Keshab Mahanta-i state Assembly nung ashi.
SDRF kübok anguba sen jagi ali anenzüka aoba atema mamshiteter saka inyakyim lateta aliba nung tzüyim ajanga anenzükba aoba süra amshitsü shia lir, ta pai ashi.
Taoba state sorkartemi Assam tzümetsüng ya ‘National Calamity’ ta züngoktsü atema Centre den mapa meinyaktet, ta Mahanta-i Asom Gana Parishad MLA Pabindra Deka-i asüngdangba langzüdang ashi.
Tanü tashi nung Assam kübok district 14 nung yimtsüng 1,200 den tema nung nisung lakh 6.41 shi timtemer, ta paisa metetdaktsü.
Tesem balala nung relief camps 81 lapokogo aser item nung nisung 21,931 tashi jenoka lir. Tzümetsüng ajanga tesem aika nung ali anenzüka bener aoer aser sorkari department ajak dang iba khuret asoshi mapa inyaktsü tetuyuba agütsüogo, ta Water Resources Minister-isa ashi.