Tzümetsüng aser anentsüh agi nisung 35 asü; 26 mangur

June 19, 2016 nü Indonesia Central Java province nung Purworejo kübok aliba Caok yimtsüng nung anentsüh agi anenbanger aliba nisungtem linük  sepaitemi bushiba noksa nung angur.

Jarkata, June 19 (Agencies) : Indonesia Central Java province nung tzünglu kanga sashia alua tzümetsüngba ajanga anentsüh alua tajemba agi nisung 35 süogo.
Tan iba anentsüh agi ki aika anenbang aser tzü agia ki meyirjang aika metsüngbangogo, ta Indonesia Disaster Management Agency otongdar Sutopo Purwo Nugroho-i metetdaktsü.
Nisung asüba den külemi ano parnok nisung 25 mangu bushitepdar, ta agency ajangsa ashi.
Honibarnü anogo piyong tzünglu kanga sashia aluba ajanga yimti 16 tashi tzü agi metsüngbang aser anentsüh alu.
Purworejo nung aliba Bogowonto ayong nunga tzümetsünga atu.
Tzümetsüng aser anentsüh timbaka Purworejo subdistrict nung atalok aser yangji nisung 11 asüba den nisung aika mangu bushitepdar.
Tatalokba ka nungbo truck gari ka nung mena alirtemi anentsüh tila ka yatoktsü meranga aliba mapang ano anentsüh tuluka alu. Iba truck gari sülen motorcycle-a aika anendena liasü aser anentsüh tulu aluba jagi yangi alir nisung 9 tashi tepset.
Disaster ketdangsertem, military aser police temi NGO tem den lokteper lendong tesem nung yaritepdar.
Brihostibar aser Hokolbar anogotem nunga West Sumatra tesem nung tzünglu kanga sashia alu aser iba mapang nisung ka asü aser nisung meyirjang aika tesem toktsür ajen. Iba tesem nungbo tzümetsüngba joko aremogo.
June ita ya iba tesem nung tzünglu malur ajisüaka National Climatology, Meteorology & Geophysics Agency-i taküm June tatem aser July tetenzüklen iba tesem nung tzünglu alutsü ta sangdongogo.
Ano Sumatra, Java aser East Nusa Tenggara tzükümtem nunga tzüsem tesashi arutsü takzüteta lir.
Nugroho-i, mapang masüdang tsüngküm mongpu melenshiba ajanga item lendong ya ataloker, ta ashi.