Tzümetsüng aser anentsüh lendong nung nisung pezü asü

March 4, 2017 nü Limapuluh Kota district kübok Koto Alam yim, West Java, Indonesia nung search & rescue team-i tzümetsüng arudang anentsüh agi nembanger aliba gari ka telung nungi tasürtem agitettsü merangba noksa nung angur. Iba lendong nung tajemba agi nisung 4 asü nisung aika pei ki toktsür jenshiogo, ta Honibarnü disaster agency ketdangser tejen kati ashi.

Jakarta, March 4 (Agencies) : Indonesia kübok Sumatra province anüolen tsütsü tzümetsüng aser anentsü aluba lendong nung tajemba agi nisung pezü asü aser nisung meyirjang aikasa pei ki toktsür jenshiogo, ta Honibarnü disaster agency ketdangser kati metetdaktsü.
Limapuluh Kota district, Indonesia nung tzünglu kanga sashia aluba ajanga tesem nung aliba nüburtem tangar den tongtepratep mesüteti akümba den ano tesangwa (light) dena raksaba agi tang yangji aliba nüburtem ammang tia nung lir.
“Anentsüh kanga ulua aluba mapang gari ti tashi anenbang. Tang tashi nung anenbanger aliba gari ka nungi nisung tasümang pezü ngua agiteta lir. Tanüngba garitemji ali aser long agi anenbanger lir,” ta osangbenertemi metetdaktsü.
“Ano tzümetsüng aruba ajanga yimtak lir nisung meyirjang aika pei ki toktsür jenshiogo, ajisüaka parnok nisung kwi jenshiar ano tejangja memetet,” ta kasa ketdangser jagisa ashi.