Tzümetsüng lendong nung nisung 16 shi asü, 3 sama: Hollande

Nice, October 04 (Agencies): France kübok French Riviera nung yipru tesashi adenba tzünglu kanga sashia aruba ajanga bener arutsüba tzümetsüng lendong nung ishiba agi nisung 16 asüba aser nisung 3 tashi samar tang bushia aliba osang ka France Tir, Francois Hollande-i tanü Deobar nü metetdaktsüogo.
Yasüng, Honibar aonung aser tanep Deobar anepdang tsüngda ghonda 3 tsüngda nung tzünglu millimetre 180 tashi aruba sülen ajanga French Riviera nung tang tzü kanga sashia metsünga aliba osang bushiteta lir.
“Tan lendong nung nisung asür, yirur aser samar den sentakba osangji tang jangjaba den timba akümtsü akok. Anungji, asenoki nungdakba maparen tali kümdangshia aser tekaraba mapang nung kechisarena ajunga inyaktsüla,” ta Hollande-i tan lendong atalokdak semdangba sülen metetdaktsü.
Antibes anasa, Biot nung tentetba tantsür tamburtem lidaktsüba ki tzü agi metsüngbanga idakji alir nisung 3 asüba aser Vallauris-Golfe-Juan tunnel tzü agi metsüngba ajanga car gari nung jajaba nisung 3 tashi arükseta asüba osang tang tashi nung jangjaogo.
Antibes aser Cannes na nunga nisung 3 tashi tzü nung arükseta asüba osang jangjaogo.
“Mandelieu-la-Napuole nunga rescue ketdangsertemi lishitzü ateta mongutetba yong ali telung nung renemba gari anendak nisung 7 tashi asüba osang bushitetogo,” ta Mandelieu-la-Napoule Mayor, Henri Leroy-i osang jangjashitsü.
Kasa tesem nung ketdangsertemi mebushitetba tasümang lishitzü telung nung alitsü akok ta pai shisem.
Tzü tali küma Cannes, Nice aser Antibes yimtitem tzü agi metsüngbangba ajanga France linük tentetba mera taket yimtitemji lishitzü agi tang sünga lir ta Cannes Mayor, Davis Lisnard-ia metetdaktsü.
Paisa ashiba agi, par rescue ketdangsertemi nisung 120 shi taküm kümzüka anitetba sülen parnokji tang rongdak jenokdak jenokdakja lir.