Tzünglruwa mongpu atema Dimapur nung senden amen

Dimapur nung April 29, 2019 Hombarnü DC conference hall nung tzüngluruwa mongpu mapang atema renemshitsü aser iba den repsema DDMA senden amenba mapang tangokba noksa nung angur.

Dimapur, Rongchii/April 29 (Agencies): Dimapur DC indang conference hall nung April 29, 2019 Hombarnü tzüngluruwa mongpu atema senden ka ayongzüka agia liasü.
Iba senden agiba mapang, tzüngluruwa mongpu atema renemshiba nung shilem ka ama District ajunga nung nübodok mapa ayongzüktsü atema State kübok tanüngba district ajak den liromedema May 4, 2019 nü Dimapur District nunga nübodok mapa inyaktsü, ta telemtetba agi.
Tzüngluruwa mongpu mapang, kilentzü, culvert aser tzü aoba tesemtem jana agi nokdangba meruktsü atema iba nübodok mapa nung Govt. aser civil bodies ajunga aruagi shilem agitsü.
Kimung lumung ajanga kilentzü aser tzü aoba tesem nokdangba tem reprangshitsü aser aibelener tem nem tapet temerenshi agütsütsü, ta kasa senden nung lemtet.
Maneni, tzüngluruwa mongpu matong tsüngda kiojentem reprangdanga aser asadangtsaü atema Line Departments dang tetuyuba agütsüogo.
Tzüngluruwa mongpu nung anentsüh alua lenmang anenbangra mesüra anenzüka ora tanga gari lenmang jangjatsü atema o lemtepa liasü. Rongdak mapang amshitsü atema item ama lenmangji anepalua yanglushia atatsü atema tim departments nem tetuyuba agütsüogo.