Tzünglu ajanga Khuzama yimdak ki aser kiojen jenti raksatsü

Jakhama (Kohima), October 22: Deobar nikongdang ajungbena tzünglu sashia aruba ajanga Khuzama yimdak tzümetsüng agi ki samatsüba noksa nung angur.  SDO (Civil) Jakhama, Alemyapang Longchar-i ashiba agi, nisung yiruba mesüra asüamaba osangbo mali. 

Kohima, October 22 (TYO): Tesüiba anogo ishika tzünglu maneni aruba aser tanü nikongdang 2:00 ako meta tzünglu ajungbena sashia aruba ajanga Jakhama Sub-division, Kohima district kübok Khuzama yimdak ki, kiset shiruru aser alu nung tsünüsempongtsü aika raksatsüogo.
Yimertemi ashiba agi, Khuzama yimdak ki trok raksaa kiojen aser osettsüset meshimeshia samabaji yim putiotsü nung tang mezüng atalokogo.
Iba den külemi yimertemi metsühba kiset shiruru aika samaogo; ajisüaka nisung yiruba mesüra asaüamababo maliasü.
Iba dak alia TB Hospital aser Eden Garden Orphanage-i aoba lenmang den külemi yimdak kibong aika tesendaktep lenmang makai kümogo.
Tzümetsüng ajanga yimdak tzü rizüngba tongti tzübo ponger oadak.
SDO (Civil) Jakhama, Alemyapang Longchar-i anir par telok, Khuzama Village Council aser Southern Angami Youth Organisation-i senteper tzümetsüng ajanga yimdak teraksatsübaji asadanga liasü.
Ajisüaka iba lendong ajanga teraksatsübaji kechi ajanga’ar kuli tejangjabo masü; yimertemi item teraksatsübaji asadangdar.