Tzünglu ajanga taküm India nung nisung 1074 süogo: Home Ministry

New Delhi, Luroi/August 27 (Agencies): Taküm tzüngluruwa mongpu nung India kübok Kerala tamajungba kongshia tzümetsüng ajanga state nung nisung noklang aika asü aser meyirjang aika talidak makai akum, ajisüaka Kerala dang masü saka tanga state aika nung alima tzü mopung lendong ajanga nisung aika süogo; item ajakji senteperbo tzünglu ajanga India nung nisung 1074 süogo, ta tanü sorkari metetdaktsü.
Tanü Home Ministry osang ka ajanga, taküm tzüngluruwa mongpu nung tzünglu ajanga Luroi/August 26, 2018 anogo tashi nung linük nung nisung 1074 süogo, ta metetdaktsü.
Asürtem rongnung Kerala nungi asür 443 tashi liasü, Karnataka nung nisung 166, Uttar Pradesh nung nisung 218, West Bengal nung nisung 198 aser Assam nung nisung 49 asü.
Home Ministry-isa, tzünglu ajanga India tesem balala nung nisung 17,14,863 relief camp balala nung jenoka lir, ta metetdaktsü.
National Disaster Relief Force (NDRF)-i Kerala densema state balala nung kümzükba maparen aser teyari agutsüba maparen inyaka liasü. Yamaji armed forces-ia tayimtsü aser rong amshia kümzükba maparen nung yaritepogo.
Ita shia radio ajanga jembiba sentong, Mann ki baat sentong nung jembidang Ato kilonser, Narendra Modi-i Kerala aser tanga state tem nung tzümetsüng lendong ajanga nisung asüba aser teraksatsüba atema tesasaba olen jembia liasü.
Ato kilonserisa Kerala aser tanga state tem dang sorkari akokba tashi yaritsü, ta ashiba den külemi NDRF aser tanga rescue & relief teams-i kümzükba maparen aser taritep maparen balala inyakba atema tenüngsang agütsü.