Tzünglu ajanga Tamil Nadu nung nisung 27 süogo

Chennai, November 11 (Agencies): Tzünglu tanen makai aruba ajanga anogo ana tsüngda Tamil Nadu, Cuddalore district nung nisung 27 tashi süogo, ta tanü state Chief Minister J. Jayalalithaa-i metetdaktsü.

Bodhbar nü sangdong ka ajanga J Jayalalithaa-i, Cuddalore district nung October nungi December ita tashi nung teti agia tzünglu 697 mm arur, ajisüaka takümbo tanü tashi nung tzünglu 500 mm tashi aruba ajanga tzümetsüng lendong ataloker, ta ashi.

November 9 nü Bay of Bengal nungi mepong tesashi ka Tamil Nadu-Puducherry tzüyimkümlen süia ao, ibaji ajanga Cuddalore district nung tzünglu sashia aruba sülen tzümetsüng lendong atalok.

Cuddalore ketdangsertemi district nung health camp 35 amenoker teyari agütsüdar.

Tzü ajanga abenba tashitaktem prokba nokdangtsü atema item health camp nung nüburtem nem mozü süngjang aser ajem agütsüdagi.

Ano külen state nung opposition party, DMK Tir M. Karunanidhi-i AIADMK sorkar aija, weather Department-i tzünglu sashia arutsü ta tekümdangtsü jilia metetdakjaka sorkari mera kecha magi, ta aitsüogo.