Tzünglu sashia arua Guwahati tesem kar metsüngbang

Guwahati, Luroi/August 24 (agencies): Guwahati tesem kar nung Rogonü/Friday anepongi tzünglu kanga sashia aruba ajanga ano tesem kar tzü agi metsüngbangogo.
Mazüngi aliba G S Road tesem nung tzünglu ghonda ka tashi arua tzü jaki temekok tashi atua metsüngbanga liasü. Lenmang ajunga metsüngbangba ajanga garitem mesenzütettsüsa kümadok aser iba tesem nung teti oli aruli asürtem (commuter) kanga timtema liasü.
Kasaji Guwahati kübok aliba R G Barua road nunga temokok tashi tzü agi metsüngbanga garitem mesenzütettsüsa kümadok.
Gari atsüngdena koba lenia motetti aliba mapang ka nung ano tzü metsüngbangba ajanga gari engine telung tashi tzü ayiba ajanga gari karbo timtem adoka liasü.
Maneni, tzünglu aruba sülen Chandmari tesem nunga tzünglu tzü agi metsüngbanga liasü.
Jorabat aser 13th Mile tesemtem nungbo terperm tashi atuagi tzü agi metsüngbanga liasü.
Highway lenmang sendaka gari noklang dak tema motetti anendaka liasü. Guwahati kübok aliba Dispur, MLA hostel campus nunga tzünglu tzü jagi metsüngbang aser iba tesem anasa aliba old bunglows of legislators meküta aliba ki tashi iba tzü agi mobanga liasü.
Iba den külemi Beltola, Sixth Mile, Panjabari, Hatigaon, Anil Nagar, Nabin Nagar aser Ambari tesemtem nugna ghonda ka tashi tzünglu sashia aruba sülen tzü agi metsüngbanga liasü.