Tzürangkong nung 27 buba NSF lokti senden amungtsü renemer

Mokokchung, April 20 (TYO): Naga Students’ Federation (NSF) pur 27 buba lokti senden taküm May tatemlen Mokokchung district kübok Tzürangkong nung amungtsü asoshi mazüngi maparen balala inyaktepdagi. Taküm iba mungdang ya Ao Kaketshir Mungdang (AKM)-i host süa ayonger.
AKM tir tasenba Sp. Imkongwatii anir par külem medemertemi mungdang takok ngudaktsütsü nükjidong yur maparen tapu balala inyaka odaki.
AKM Organizing Committee convener aser taoba NSF tir Imchatuba Imchen aser par külem medemertemi Tzürangkong local organizing committee den kanga junga amalitepa aser tongtepratepa maparen balala inyakdaki aser par telokisa April 15 nüto mungdang akatsüba tesem semdanga liasü.
Assam den artsü süa aliba Tzürangkong kübok yim tajemba agi ti (8) shi lir aser tang NSF mungdang kiji Chungtiayimsen yimdak yangludar. Asenoki metettsüba kaji taoba 2009 küma AKM-i host süa 23 buba NSF lokti senden Mopungchuket yimdak mungogo.
“Joko mungdang anasa arur asünung, iba sentong takok angutsü asoshi kija, lokti aser senso nübur ajaki amalitepa yaridaktsünür”, ta AKM tir Imkongwati aser AKM Organizing Committee convener Imchatuba nati mepishia metetdaktsü. Iba mungdang nung federating unit balala nungi delegates meyi anashi arua adentsü imladaki.